Gjithçka për pasojë e vonesave të shumta dhe mungesës së një ftese për të përfaqësuar fanellën kuqezi.
Pritja e gjatë e lodhi mesfushorin 22-vjeçar, i cili nuk kishte ndër mend të harxhonte më shumë kohë me shpresën se një ditë FSHF do të kujtohej dhe t´a ftonte për të luajtur me kombëtaren shqiptare.
Për këtë fakt vendosi të zgjidhte të luante për Maqedoninë, e cila e kërkonte me ngulm.
Enis Bardhi ka qenë në listën e dëshirave të ish-trajnerit Xhani De Biazi, i cili e kishte në planet e së ardhmes mesfushorin e talentuar.
Mes italianit dhe lojtarit shqiptar ka pasur kontakte të vazhdueshme kohë më parë dhe Bardhi kishte pranuar të luante për Shqipërinë, raporton Panorama sport.
Mirëpo, De Biazi i kishte thënë se për momentin nuk kishte shumë mundësi për ta grumbulluar sepse në repartin që luan ai (mesfushë) kishte shumë të tjerë. 22-vjeçari me familjen e tij e pranuan deri diku këtë gjë dhe vendosën të prisnin, por ftesa nuk po vinte kurrë.
Nga ana tjetër, Maqedonia kërkonte me këmbëngulje dhe i gjendur përballë kësaj situate, Bardhi vendosi të luante për Maqedoninë. 22-vjeçari ka lindur në Shkup dhe aktualisht është pjesë e skuadrës së Levantes në kampionatin spanjoll.
Ai ishte titullar në sfidën mes Maqedonisë dhe Shqipërisë të luajtur në Strumicë, e cila përfundoi barazim dhe Bardhi zhvilloi një ndeshje deri diku pozitive.
Mund të kishte veshur fanellën kuqezi në ato 90 minuta, por atë e provoi vetëm në fund pasi e ndërroi me Hykën në fundin e ndeshjes. Ndoshta mund të jetë bërë një mësim i mirë për FSHF-në, që të mos i vonojë shumë ftesat, të paktën për lojtarët që i ka në plane. /tesheshi.com/
