Kryeministri Edi Rama, ka vizituar Çekinë në mënyrë të papritur, shumë pak kohë pas shpërthimit të të ashtuquajturës “bombës ÇEZ”.
Një ditë pas disa “bombave tymuese” të dy eksponentëve të lartë të LSI-së, përkatësisht kryetarit Ilir Meta dhe deputetit “me çantë” Spartak Braho, të cilët siluruan kreun e mazhorancës në zenithin e tij, kur po pritej ekipi kombëtar.
Ndërsa Meta i kujtoi Ramës të merret me të përmbyturit e jugut, Spatak Braho shprehu publikisht angazhimin për të mbrojtur ballist Morinën ligjërisht, pasi e vizitoi atë në burgun e Vaqarrit.
Dhe kjo nismë e LSI-së ka ardhur pikërisht e rakorduar me opozitën e Lulzim Bashës, i cili e shpalli lirimin e ballistit të dronit si kauzë të PD-së.
Ndërkaq, sot ka qenë ish-ministri i brendshëm i PD-së, Flamur Noka, i cili ka vizituar sërisht Ismailin e famshëm të Kukësit.
Por pikërisht sot, në këtë mjedis ku situata politike duket e galvanizuar, Edi Rama, vizitoi vendin që mban fshehur dokumentet e CEZ, që konsiderohet një bombë e vërtetë, nëse publikohen dokumentet e pafundme të marrëdhënieve që fshehin miliona të shpërdoruara.
Megjithëse në konferencën për shtyp nuk u fol për CEZ, mësohet se një nga marrëveshjet e firmosura nga Edi Rama dhe Bohuslav Subotka, ka të bëjë me shkëmbimin e dokumenteve zyrtare mes dy vendeve për marrëveshjet e ndërsjellta.
Dhe pikërisht, kjo marrëveshje, bën të mundur ardhjen në Tiranë, të të gjithë atyre dokumenteve që janë të “fshehura” në Pragë dhe mund të vihen në dispozicion të Prokurorisë shqiptare, konkretisht task-forcës së drejtuar nga Dritan Rreshka që do të hetojë korrupsionin e zyrtarëve të lartë.
Megjithatë në konferencën për shyp nuk u fol asnjë fjalë për çështjen e marrëveshjen me kompaninë që deri para dy vitesh kishte në pronësi Operatorin e Shpërndarjes së Energjisë Elektrike në Shqipëri.
Rama firmosi pesë marrëveshje bashkëpunimi mes dy vendeve në fusha të ndryshme.
Siç bën të ditur qeveria shqiptare, marrëveshjet synojnë të rrisin bashkëpunimin në turizëm, arsim, mjedis, katastrofat natyrore dhe njohjen e pensioneve.
Në konferencën e përbashkët për shtyp, me homologun e tij Subotka, Rama vlerësoi nivelin e bashkëpunimit mes dy vendeve, por tha se ka vend për të bërë shumë më shumë.
“Diskutuam për marrëdhënien mes dy vendeve tona që kanë një potencial të madh. Ka mundësi reale që përmes bashkëpunimit të sipërmarrjeve të shkohet në një stad tjetër. Nënshkruam pesë marrëveshje bashkëpunimi”, tha Rama.
Nga ana e tij, homologu çek Sobotka shprehu mbështetjen e Çekisë për rrugën integruese të Shqipërisë dhe gjithë Ballkanit Perëndimor në Bashkimin Europian dhe tha se kompanitë çeke janë të interesuara dhe kanë çfarë ofrojnë në tregun shqiptar, kryesisht në investimet në infrastrukturë, turizëm dhe gaz.
Një urë e fortë lidhëse mes dy vendeve vlerësohen vizitorët çekë që zgjedhin Shqipërinë çdo vit. Rama tha se për këtë vit numri i tyre ishte 14 mijë dhe ftoi të tjerët që të vizitojnë vendin tonë për t’u njohur me bukuritë natyrore, mikpritjen dhe kuzhinën shqiptare.
Rama dhe Sobotka u pyetën edhe për krizën e refugjatëve dhe angazhimin rus në Siri.
/tesheshi.com/
