Sekretari i Përgjithshëm i NATO-s, Jens Stoltenberg, e viziton Shqipërinë me misionin politik për të dhënë mesazhin e ndaljes së përpjekjeve për destabilizim në Ballkan, që kanë nisur prej vitesh, me Rusinë të akuzuar si përkrahëse e qarqeve antiperëndimore.
Vizita në Tiranë e kreut të Aleancës së Atlantikut Verior është e para që nga viti 2011, kur parardhësi i zotit Stoltenberg, Rasmusen, erdhi me urgjencë në Tiranë pas miratimit të një ligji për shërbimin sekret nga qeveria “Berisha”, që i shqetësoi shumë strukturat e organizatës.
Sipas njoftimit të zëdhënëses së NATO-s, Oana Lungescu, Jens Stoltenberg do të pritet nga presidenti i Republikës, Bujar Nishani, nga ministri i Jashtëm, Ditmir Bushati, si dhe nga ministrja e Mbrojtjes, Mimi Kodheli. Takimin më të rëndësishëm të ditës kreu i NATO-s do ta zhvillojë me kryeministrin Edi Rama, me të cilin do të mbajë dhe një konferencë për shtyp.
Pas ftesës për pranim për Malin e Zi, vizita e Stoltenberg-ut në Tiranë është pjesë e “ofensivës” diplomatike për ta shpëtuar këtë pjesë të Europës nga ekspansioni i ndikimit rus. Jo shumë kohë më parë Mali i Zi u përfshi nga përleshjet në rrugë, në një përpjekje për ta rrëzuar qeverinë aktuale të Milo Gjukanoviç-it, për ta ndaluar bashkimin e republikës së vogël sllave me klubin e vendeve që mbrohen nga Aleanca Veriatlantike.
Përndryshe, kjo vizitë është e rëndësishme edhe pas ngjarjeve që ndodhën në kufirin turko-sirian me rrëzimin e avionit rus që shkeli hapësirën e mbrojtur nga NATO-ja, një incident që rrezikon ende ta përshkallëzojë më tej situatën.
Por kjo vizitë ka edhe karakter lokal, pasi, siç mësohet nga burime diplomatike, Shqipëria është një terren fertil i ndikimit rus, dhe mund të krijohen vatra destabilizimi, duke pasur parasysh edhe influencën në Kosovë. Prej muajsh një pjesë e opinionit publik shqiptar është e mbarsur me një filorusizëm që po zë vend çdo ditë në faqe mediash dhe në qarqe me ndikim.
Ndërkaq, shqetësimi për një përkeqësim të situatës politike pritet të bëhet sot në Tiranë i ditur edhe nga sekretari i përgjithshëm i NATO-s. Ky shqetësim u bë i njohur në fakt edhe nga dyshja e ambasadorëve, të SHBA-së dhe BE-së, pas incidenteve të ndodhura në protestën e opozitës.
Ajo që ka rënë në sy tek qarqet euroatlantike është pikërisht një dozë e shtuar e ndikimit rus edhe në qarqe politike në Tiranë. Kështu, një organ mediatik pranë një grupimi politik të rëndësishëm boton reportazhe dhe portrete të ushtrisë ruse dhe ngre lart forcën ushtarake të Kremlinit, kur duket se këto informacione nuk puqen aspak me interesin e publikut shqiptar.
Por një mesazh të fortë pritet që Stoltenberg të japë edhe për çështjen e luftës ndaj korrupsionit. Pikërisht dje që ishte dita e luftës ndaj korrupsionit, sekretari i përgjithshëm i NATO-s tha se, “Ne kemi perspektivë afatgjate, dhe e kuptojmë rëndësinë e reformave dhe ndërtimin e institucioneve, si dhe luftën ndaj korrupsionit”. /tesheshi.com/
