Një fakt i ri ka dalë nga rezoluta pë Srebrenicën, votuar kundër nga mazhoranca në Parlament, e cila e arsyetoi se i kish thënë “Jo” Berishës, propozuesit, e jo genocidit serb.
“Mësohet se nga shumica i është kërkuar Rithemelimit si kusht për votë unanime ajo që në rezulotë të dënohej thyerja e embargos së naftës nga qeveria e kohës, ndryshe nga Berisha.
Nëse në korrik të vitit 1995 ne kemi ende diçka të pashprehur që unë jam dakord, dhe këtu po të ftoj pastaj kompromisin; meqenëse ngjarja ka ndodhur në korrik të vitit 1995, bujrëm, të ndëshkojmë me deklaratë edhe Presidentin e Shqipërisë së asaj kohe, Sali Berisha, Parlamentarizmi dhe politika janë arti i kompromisit dhe unë po të ofroj kompromisin. Kompromisi është: bujrum, të bëjmë një deklaratë për këtë çështje, ku pjesë të deklaratës së Kuvendit, të rezolutës së Kuvendit, të jetë dënimi i bashkëpunimit të Sali Berishës, të kompanisë ‘Shqiponja’ në furnizimin me karburant të regjimit të Milosheviçit, i cili ua transferonte Mlladiçit dhe Karaxhiçit që vrisnin jetë të pafajshme. Dakord, bujrëm, si pjesë e rezolutës të përfshihet edhe kjo çështje; nëse jo, s’biem dakord”, mësohet të jetë shprehur kreu i grupit socialist Taulant Balla, cituar nga Shqiptarja.com.
Por sigurisht që kjo s’mund të pranohej nga propozuesit, edhe për faktin se rezolutës që larg i binte era diversion, nga ato më të rëndët madje politikë.
“Duhet të jemi seriozë. Këtu ka një procedurë parlamentare, është paraqitur një rezolutë nga një grup kolegësh dhe kjo nuk ndryshon, të cilën ose mund ta votoni, ose mund të mos e votoni. Dakord, mund të mos e votoni, atëherë e hapim debatin nesër në seancë plenare… Këtu nuk bëhen diskutime teorike të heqim këtë pjesë apo atë pjesë, sepse nuk ka të tilla gjëra, ky është materiali i saktë ose merreni, ose lëreni. Kaq”, ka qenë reagimi i Tritan Shehu nga Rithemelimi, një ndër ideatorët e Rezulotës.
Siç mund të nuhatet, Rezulota nuk ka patur si qëllim që të votohet por që të mos votohet. Ndryshe nuk kishte pse bëhej, gjersa ishte tërësisht pa kontekst të caktuar, pra jashtë vendit dhe kohës. /tesheshi.com/
