Një skemë e re ka hyrë në fuqi që dje në mbrëmje, pikërisht kur është parë që Edi Rama ka arritur të ketë gati një shumicë që të mos rrezikojë rrëzimin e qeverisë.
Një burim diplomatik perëndimor bëri të ditur se gjithçka ka ardhur pasi në orët e vona të ditës së djeshme, ka qarkulluar dhe ka nisur të punohej për një variant të ndryshëm të draftit të reformës; por më e rëndësishmja se Ilir Meta ka nisur negociatat me një grup brenda Partisë Socialiste për të ndërtuar një kabinet të drejtuar nga vetë ai që do të mbështetej nga një pjesë e PS-së, LSI-ja dhe Partia Demokratike, nga jashtë por jo për të marrë pjesë direkt.
Një diplomat europian bëri të ditur se drafti i komisionerit Johanes Hahn ka shërbyer për të prishur më shumë situatën, pasi u dha përshtypja se ka rënë variant i zonjës Nuland.
Ambasada amerikane në Tiranë nuk ka marrë pjesë në asnjë negociatë pas komunikimit të Johanes Hahn me Edi Ramën, Lulzim Bashën dhe Ilir Meta.
Siç mësohet, ka një problem të keqintepretimit të një telefonate të Lulzim Bashës dhe kancelares Angela Merkel, e bërë gjatë ditës së djeshme. Për këtë çështje, pritet një komunikim nga ana e ambasadës gjermane në Tiranë.
Siç po mësohet, Arta Dade, Anastas Angjeli, Ben Blushi, Mimoza Hafizi, Vladimir Kosta dhe Mira Shehu shikohen si deputetët socialistë që pritet të votojnë qeverinë e re me kryeministër Ilir Metën.
Pikërisht kjo situatë ka alarmuar jo vetëm politikën por edhe ndërkombëtarët, të cilët e kanë quajtur të papranueshme të negociohet për një mazhorancë të re ndërkohë, ndërkohë që po negocohet për reformën.
Megjithatë situatat janë në zhvillim e sipër dhe pritet që sot të ndodhë gjithçka. Nga nesër politika shqiptare nuk do të jetë si më parë. /tesheshi.com/
