Nga Blendi Gashi
Qeveria e Kosovës e udhëhequr nga Isa Mustafa është lavdëruar tej mase me organizimin e bërë për pritjen e zv.presidentin amerikan, Joe Biden, i cili të mërkurën qëndroi për vizitë në Kosovë.
Sokol Havolli, këshilltari i parë i kryeministrit, për më tepër i ka bërë reklamë koleges së tij, Dumoshi, shefes së kabinetit të kryeministrit, e cila udhëhoqi ceremoninë e përurimit të rrugës Ferizaj – Gjilan, që mban emrin e djalit të nënpresidentit amerikan.
Havolli përmes një postimi në Facebook ka thënë se zv.presidenti Biden ka falënderuar enkas Dumoshin për organizimin e bërë.
Por, në fakt në pah kanë dalë shumë lëshime që janë bërë me organizimin, qoftë me, apo pa qëllim.
Portale të ndryshme kosovare që shumica prej tyre nuk mund të quhen medie serioze, raportuan se organizimi është bërë nga Ambasada amerikane, dhe se kinse ambsada në fjalë nuk u bëri ftesa deputetëve të caktuar për përurimin e rrugës.
Në të vërtetë këto shkrime rezultuan të pasakta dhe dashakeqe, pasi më vonë u kuptua se organizimi për ceremoninë në fjalë, pra ftesat janë bërë nga qeveria “Mustafa”.
Dhe, lideri i LDK-së, edhe me këtë rast tregoi se më tepër se gjithçka brenda vetës së tij, ka hakmarrjen dhe këtë e bëri edhe në organizimin për Biden.
Isa Mustafa, ndërsa i bëri ftesë deputetës së Vetëvendosje-s Puhie Demaku për të marrë pjesë në organizimin për përurimin e rrugës së djalit të ndjerë të Biden, një gjë të tillë nuk e bëri për dy deputetët e partisë së tij: Vjosa Osmanin që është deputetja më e votuar e LDK-së dhe deputetin më të zëshëm kundër Demrakacionit, Shpejtim Bulliqi.
Vjosa Osmani: Emrin tim dhe të kolegut Bulliqi e largoi qeveria, jo ambasada e SHBA-së
Deputetja Vjosa Osmani ka reaguar e para pas shkrimeve të portaleve që raportuan se ambasada e SHBA-së e hoqi nga lista, duke thënë se kjo është një e pavërtetë e madhe gjë që e dokumentoi më pas.
Deputetja Osmani siguroi një ftesë, që i është bërë një prej kolegëve të saj deputetë të LDK-së, ku dëshmohet se ftesat për ceremoninë e inaugurimit të rrugës janë dërguar nga ana e kryeministrit, e jo nga ambasada amerikane.
“Pra, emrin tim dhe të kolegut tim z. Shpejtim Bulliqi e ka larguar qeveria, e jo ambasada amerikane”, bëri të ditur Osmani përmes një shkrimi në Facebook.
“Pasi morën urdhrat e tyre nga persona tashmë të njohur, disa analfabetë që të vetmen gjë në CV-në e tyre jetësore e kanë servilizmin e jargavitjen pas kriminelëve, e paskan dezinformuar opinionin se emri i Vjosa Osmanit është larguar nga ambasada amerikane nga lista e të ftuarve. Këto të ashtuquajtura portale, që nuk dua t’ua përmend emrin, sepse edhe ashtu thuaja askush nuk i lexon e as nuk iu beson, marrin guximin të gënjejnë në emër të Shteteve të Bashkuara të Amerikës, duke ua veshur një veprim me të cilin ky shtet, e as ambasada në vendin tonë, nuk ka asgjë të bëjë. Po si nuk iu shkoi mendja, në emër të gazetarisë profesioniste, të pyesnit ambasadën nëse ata vërtetë e kanë bërë një gjë të tillë, por u mjaftuat me gënjeshtrat e analfabetëve-kriminelë sikur ju, të cilët nuk e njohin as punën, as parimin, e as interesin shtetëror, sepse janë ngritur aty ku janë vetëm nëpërmjet gënjeshtrave e shpifjeve ndaj të tjerëve. Natyrisht, metodat e tilla komuniste të shpifjes e denigrimit personal ka kohë që kanë zënë vend në skenën tonë politike dhe në disa pseudo-portale që i kontrollojnë ose i kanë krijuar rishtazi.
Listat dhe ftesat për deputetët për inaugurimin e rrugës me emrin e djalit të nënpresidentit Biden janë përgatitur nga qeveria e Kosovës e JO nga ambasada amerikane”, ka shkruar Vjosa.
Deputetja e LDK-së, për të treguar se ka përkrahejn amerikane, ka publikuar një koleksion fotosh siç ka thënë vetëm për disponimin e atyre që i kanë porositur këto gënjeshtra të ndyra.
“Vetëm puna ime. Ndiqeni këtë rrugë nëse doni të ju respektojnë edhe populli juaj por edhe miqtë tanë. Por, natyrisht, këtë rrugë e këtë gjuhë nuk kanë si e kuptojnë analfabetët-kriminelë-servilë”, ka thënë deputetja Osmani.
Shpejtim Bulliqi: Nga lista na hoqi qeveria e Isa Mustafës
Edhe deputeti tjetër i LDK-së, Shpejtim Bulliqi, ka reaguar ndaj raportimit të disa mediave nuk ka qenë i ftuar nga ambasada e SHBA-ve. Ai ka thënë se qeveria e Kosovës e cila e ka bërë agjendën dhe i ka ftuar mysafirët, e jo Ambasada Amerikane.
“Që organizatori dhe ai i cili i ka bërë listat është Qeveria e Kosovës dhe nuk është mirë të keqpërdoret Ambasada e SHBA-ve. Dhe ajo që ka mundur të na heq nga listat është qeveria e Isa Mustafës”, ka thënë Bulliqi.
Portali tesheshi.com gjatë ditës ka tentuar të marrë një prononcim nga qeveria e Kosovës lidhur me çështjen në fjalë, pse deputetëve Bulliqi e Osmani nuk u janë bërë ftesat, por zyrtarët qeveritarë nuk janë përgjigjur në telefon.
Ndryshe, deputetët e LDK-së Shpejtim Bulliqi dhe Vjosa Osmani mbajnë qëndrim kundërshtues ndaj Demarkacionit aktual me Malin e Zi, ku Kosova rrezikon t’i humb mbi 8 mijë hektarë.
/tesheshi.com/
