Nga Ylli Pata
Një mision të vërtetë diplomatik ka ndërmarrë lideri i opozitës, Lulzim Basha, pasi ka dalë jo fort mirë me amerikanët gjatë miratimit të Reformës në Drejtësi.
Burime pranë opozitës bëjnë të ditur se Lulzim Basha ka shkuar në Filadelfia, ku po zhvillon punimet Konventa e Partisë Demokratike Amerikane, pikërisht për të siguruar një imazh të pastruar nëse nga janari 2017 Hillary Clinton do të zgjidhet presidente e re e Shteteve të Bashkuara të Amerikës. Dhe kjo ka me të vërtetë gjasa të ndodhë.
Pikërisht kjo e shpjegon edhe kujdesin e kreut të selisë blu që të mos shkojë në konventën e aleatit natyral të djathtë, Donald Trump-it, pra, të republikanëve, por tek demokratët e qendrës së majtë.
Kjo ka disa arsye, por edhe synime. Arsyet janë në fakt mjaft logjike.
Partia Demokratike prej vitit 2011 paguan një kompani të madhe lobimi amerikane, Podesta Group-in. Një kompani e cila ndodhet më shumë pranë Partisë Demokratike Amerikane, sesa asaj Republikane. Kreu formal i Podesta-s është Tony Podesta, por koka reale e këtij grupi të fuqishëm strategjik në politikën amerikane është i famshmi John Podesta, i cili është dhe truri i fushatës së zonjës Clinton. Tony Podesta është shefi i stafit të fushatës së kandidates për president, dhe sipas të gjitha gjasave, ai do të bëhet sekretari i ardhshëm i Shtetit. Kjo pasi ai ka qenë gjatë administratës së Bill Clinton-it shef i stafit të Shtëpisë së Bardhë, ndaj tani pret një rol më të rëndësishëm, pasi edhe pasha e tij është më e madhe.
Nëse ndodh kjo, atëherë PD-ja do ta ketë shumë më të lehtë për të zbutur çarjen e madhe që ka ndodhur me amerikanët, sidomos pas raporteve të forta që ambasadori Donald Lu, por edhe nënsekretarja Nuland, madje edhe Ssekretari Kerry, kanë hartuar për Shtëpinë e Bardhë mbi rolin e opozitës në reformën për drejtësi.
Siç mësohet, Podesta po punon fort që të sigurojë një takim të Lulzim Bashës ose me Hillary-n, ose e pakta me bashkëshortin e saj, ish-presidentin Bill Clinton. Dëmtimi që i ka ndodhur Partisë Demokratike, madje edhe Bashës vetë, nuk ka qenë i vogël, dhe këtë e kanë pranuar si eksponentë të PD-së, por edhe përfaqësues të rëndësishme të politikës amerikane. Madje, siç e kemi bërë të ditur në një shkrim të pak kohëve më parë, Uashingtoni po përkrah një plan të Eduard Selamit për të kërkuar kreun e opozitës shqiptare nëse Lulzim Basha i humb zgjedhjet e ardhshme.
Pikërisht ky është synimi i operacionit diplomatik të Lulzim Bashës: të rikuperojë rolin e tij si “kryeministri i ardhshëm”.
Një operacion të njëjtë ka ndërmarrë edhe Edi Rama pas zgjedhjeve lokale të 2011, kur ndërsa të gjithë prisnin “kryengritjen” për marrjen e mandatit të kreut të bashkisë së Tiranës, ai u struk, shkroi “Kurban”-in, dhe më pas nisi një politikë totalisht konstruktive.
Politika amerikane nuk ndryshon me lëvizjen e qeverive, por lobimi bën që gjërat e forta të zbuten. Dhe Uashingtoni mund t’i japë një shans tjetër Lulzim Bashës, me kusht që ai të bëhet më bashkëpunues.
Realisht kjo ndodhi edhe në vitin 2005 me Sali Berishën. Edhe pse Bill Clinton në vitin 1996 i kishte thënë presidentit të ndjerë Ibrahim Rugova, kur ky i fundit kërkoi që SHBA-të ta mbështesin Berishën, që “lumi kalon vetëm një herë në atë shtrat”, Departamenti i Shtetit i dha “dritë jeshile” rikthimit të Sali Berishës në qeverisje.
Por këtë herë Basha do të duhet të nisë një operacion për reformimin e PD-së, duke u dhënë më hapësirë zërave kritikë, dhe më pas të bëhet bashkëpunues në Kuvend.
Burime nga opozita bëjnë të ditur se ky ka qenë qëllimi pse lidershipi i PD-së nuk ka mbajtur një qëndrim drastik, siç pritej, për “tradhtarët” Bregu, Selami, Patozi e Cara, që u bënë gati ta votojnë reformën në drejtësi edhe pa urdhrin politik të Berishës e Bashës. /tesheshi.com/
