Një skandal i ri është risjellë në skenë nga politika shqiptare sot, çka ka nxjerrë në pah një përplasje të fuqishme të PD-së me qeverinë, por edhe një përkrahje të LSI-së për argumentin e PD-së.
Aq shumë ka qenë kohezioni mes PD-së dhe LSI-së sa Ministri i Drejtësisë, Ylli Manjani i ka kërkuar Prokurorisë së Përgjithshme të nisë hetimet mbi përgjimet për të cilat akuzohet prokuroria.
Por si është problem?!
Ish-kryeministri Sali Berisha, në një status të tij në faqen e Facebook theksonte se ministri i Brendshëm Saimir Tahiri, ka përgjuar udhëheqës të lartë të shtetit duke përmendur Presidentin Nishani, kryeparlamentarin Meta, kryebashkiakun Veliaj, deputetin Koço Kokëdhima, por edhe ambasadorë e politikanë të tjerë.
Pas Berishës ka dalë ish-ministri i Brendshëm, Flamur Noka, i cili ka akuzuar Tahirin zyrtarisht se po përdor në kundërshtim me ligjin një pajisje përgjimi të pacertifikuar.
Pas Nokës, Sekretari i Përgjithshëm i LSI-së, Luan Rama, në një intervistë në gazetën “Panorama” tha se ky është një skandal dhe duhet të hetohet.
“Nëse realisht gjendet një pajisje e tillë e instaluar dhe e paregjistruar, qoftë edhe vetëm për trajnim siç thuhet, jemi përpara një skandali të madh shtetëror. Prokurori i Përgjithshëm, por unë gjykoj që edhe instrumentet e kontrollit parlamentar, duhet të investohen maksimalisht, për të zbardhur të vërtetën dhe për të vënë para përgjegjësisë ligjore cilindo person përgjegjës”, tha Luan Rama.
Ndërkaq, Ministri Tahiri, siç e vumë në dukje edhe dje, deklaroi në rrjetet sociale se “e keqja ka shkuar përtej opozitës”. Një referim i qartë për Prokurorin e Përgjithshëm dhe aleatin e tij LSI.
Ndërkaq, sot në mëngjes, Flamur Noka, nënkryetari i Komisionit Parlamentar të Sigurisë mblodhi komisionin dhe kërkoi raportin të të gjitha organeve që kanë të drejtë përgjimi.
Kreu i Komisionit të Sigurisë, Spartak Braho, mungon prej kohësh pasi ndodhet për kurim në Turqi.
“Nëse realisht gjendet një pajisje e tillë e instaluar dhe e paregjistruar, qoftë edhe vetëm për trajnim siç thuhet, jemi përpara një skandali të madh shtetëror. Prokurori i Përgjithshëm, por unë gjykoj që edhe instrumentet e kontrollit parlamentar duhet të investohen maksimalisht, për të zbardhur të vërtetën dhe për të vënë para përgjegjësisë ligjore cilindo person përgjegjës”, deklaroi Flamur Noka.
Deputetët e PS-së theksuan se nuk mund të bëhet kjo kërkesë tafti-bafti, kur ka nisur një hetim dhe s’mund të merret spunto vetëm nga lajmet e dala pa burim.
Pas kësaj PS ka lënë mbledhjen dhe në takim ka mbetur vetëm LSI dhe PD.
Por si qëndron realisht çështja e përgjimit?!
Sipas Kushtetutës dhe ligjeve të Republikës, asnjë qytetar nuk mund të përgjoheshin pa vendim gjykate.
Në vitin 2012 u ndryshua ligji për përgjimet dhe u vendos që të përgjohen thjesht me një shkresë të Prokurorit të Përgjithshëm.
Sipas këtyre ndryshimeve u përcaktua që përgjimet nuk kryhen vetëm nga Prokurori i Përgjithshëm dhe Shërbimi Informativ Kombëtar, por edhe nga Shërbimi i Kontrollit të brendshëm në Ministrinë e Brendshme, Shërbimi Informativ i Ushtrisë, Policia Tatimore në Ministrinë e Financave dhe Policia e Burgjeve.
Në atë kohë opozita e atëhershme, sot mazhoranca, akuzoi Arben Imamin, Ministër i Mbrojtjes në atë kohë, se ka blerë në Izrael një pajisje përgjuese që përgjon jo vetëm deputetët e opozitës dhe gazetarët, por edhe ambasadorët e perëndimit.
Sot opozita bën të njëjtën gjë? Vetëm se akuza është kthyer mbrapsht. Por ndryshimi i ligjit ia ka dhënë Edi Ramës dhe Tahirit të drejtën e përgjimit…
Megjithatë çështja në këtë rast është më triller sepse bëhet fjalë për një pajisje që e përdor misioni Italian në ndihmë të policisë shqiptare INTERFORCE, i cili është ai që zbuloi në vitin 2001 grupin e kokainës me Sokol Koçiun në krye, por bëri edhe përgjimet në Lazarat. Madje një helikopter i INTERFORCE u qëllua në vitin 2004 në Lazarat, kur po merrte filmime nga plantacionet e drogës.
Megjithatë çështja e përgjimeve duhet të sqarohet një herë e mirë pasi në Shqipëri pushteti përgjon këto pa asnjë lloj rregulli dhe duke shkelur të drejtat elementare njerëzore. Madje kjo është bërë edhe me ligj./tesheshi.com/
