Nga Ylli Pata
Edi Rama mbledh kryesinë e vogël të PS-së dhe i kërkon që modelin dibran ta shpërndajnë në të gjithë vendit, sipas të cilit do të duhet që të neutralizohet fuqia rekrutuese e LSI-së në terren.
Burime pranë PS-së, bëjnë të ditur se Rama ka thirrur në selinë rozë sekretarët – përveç Kokëdhimës tashmë që është mënjanuar – dhe u ka bërë të ditur skemën e re për zgjedhjet parlamentare.
Strategjia është e thjeshtë: aty ku LSI është e fortë, në raportet me njerëzit të futen elementë të PS-së, siç ndodhi në Dibër. Do të nisë premtimi për gjithçka dhe “do të hapet thesi”.
Rritja e rrogave dhe pensioneve që do të bëhet ditët e ardhshme është vetëm maja e ajsbergut.
Pasi mblodhi Asamblenë të shtunën ku miratoi një sërë rregullash dhe dokumentash partiakë, Rama ka mbledhur edhe kryesinë e vogël të PS-së dhe sekretariatin ekzekutiv për të diskutuar më në detaje strategjinë e fushatës elektorale që do të maksimalizojë votën në zgjedhjet e verës së vitit 2017.
Kështum një ndër hapat kryesore për Ramën, Kryesinë dhe Sekretariatin Ekzekutiv ka qënë përzgjedhja e ekipeve elektorale në çdo bashki, me njerëz me reputacion dhe të pakonsumuar me pushtet dhe që kanë një mbështetje maksimale në komunitet.
Njëherësh, një rëndësi të jashtëzakonshme përpos ekipit elektoral, ka dhe përzgjedhja e kandidatëve që do të jenë jo vetëm në përbërje të ekipit dhe shtabeleve elektorale, por do të jenë njerëzit që do të vënë në funksion të maksimalizimit të votës aftësinë, integritetin e tyre, mundësinë bashkëpunuese dhe besueshmërinë përballë votuesit në secilën bashki të vendit.
Një ndër elementët e diskutuar është dhe fushata që do të çojë përthithjen e maksimumit të votave të majta dhe të pjesës gri nga ana e PS-së.
Dhe në këtë kontekst, është diskutuar strategjia për të minimizuar peshën elektorale të aleatit në qeverisje, LSI-së, parti që për të gjithë socialistët është fuqizuar në kurriz të tyre. Pikërisht, rikthimin e votës sërish tek PS-ja kanë diskutuar në takimin e zhvilluar kryetari Rama, kryesia e vogël dhe Sekretariati Organizativ i kësaj partie. /tesheshi.com/
