Dalja e ambasadorit amerikan në një restorant pranë çadrës së Partisë Demokratike dhe dreka me Lulzim Bashën ka qenë një vazhdim i një kontakti që deputetë të opozitës kanë mbajtur prej ditësh me selitë diplomatike në Tiranë.
Por siç bëri të ditur një zyrtar që ka qenë prezent në restorantin e zonës së bllokut, aty ku ambasadori amerikan në Tiranë dhe Lulzim Basha qëndruan 40 minuta, njeriu që ka folur në takim për thuajse gjithë kohën ka qenë Donald Lu.
Siç mësohet ai i ka përcjell një mesazh, normalisht nga qeveria amerikane, ndërkohë që Basha në pjesën më të madhe të kohës ka ngrënë.
Thuajse nuk ka folur fare, përveç përshëndetjeve të rastit dhe emetimit të lajmit se ai do takonte aleatët e opozitës pas takimit.
Po cilat kanë qenë fjalët e Donald Lu-së karshi Bashës? Burimet diplomatike janë shumë të rezervuar ta thonë, por sigurisht që bëhet fjalë për një mesazh shumë të rëndësishëm në një kohë me zhvillime delikate.
Dhe ky takim ka ardhur pas vizitës në Zagreb të Hoyt Yee, Zv.asistent i Sekretarit Amerikan të Shtetit për Euroazinë; përkatësisht zyrtari i lartë i DASH që ka zënë vendin e zonjës Victoria Nuland, tashmë e dorëhequr.
Zoti Lee, ka qenë edhe në administratën e Presidentit Obama, por që vazhdon të punojë edhe në addministratën e Presidentit Trump.
Zyrtari i lartë i DASH, i cili mori pjesë në një samit të rëndësishëm në Kroaci, nuk vizitoi asnjë vend tjetër të rajonit, por dha prej atje vetëm një deklaratë për Maqedoninë, ku përsëriti qëndrimin ndaj Ivanovit për t’i dhënë mandatin e Kryeministrit Zoran Zaevit.
Pra kemi të bëjmë me një përforcim qëndrimi dhe mesazh që nuk ka dy qëndrime nga Uashingtoni zyrtar.
Pas kësaj ka qenë Donald Lu që e ka takuar Bashën në një ambjent formal për t’ia bërë të ditur qëndrimin. Pra nuk është debatuar shumë, ndonëse dreka i ka dhënë dhe një përmasë paksa miqësore takimit. Bashës thjesht i është kumtuar, ngjashëm si në kafenë me znj. Mogherini, nga kjo e fundit.
Dhe pas drekë-takimi, sërish në përngjasim me post-kafenë me Mogherinin, lideri i opozitës shqiptare ka dalë më i trishtuar dhe në inat e sipër ka shpallur ngritjen e “Kuvendeve qytetare” në çdo qark të vendit.
Megjithatë, le të japim dy deduksionet që vijnë nga takimi Lu-Basha: ose SHBA ka ndryshuar qëndrim dhe kreu i opozitës ka marrë zemër nga zëri zyrtar i Uashingtonit, ose sërish po vepron kundër këtij qëndrimi.
Realisht nëse do të ketë ndodhur e para, pra që SHBA do të mbështesë aksionin e Bashës, Donald Lu do të shkonte në çadër, apo e pakta do të mbante një deklaratë publike pas takimit me kreun e PD-së.
Dhe jo vetëm që nuk e bëri, por dëshmitari nga lokali që ndoqi takimin tha se të dy, si Lu e si Basha kanë qenë gjatë gjithë kohës të tensionuar. Ambasadori amerikan nuk ka futur gjë në gojë për 40 minuta, ndërsa Basha ka ngërë në kohën që ambasadori amerikan i përcillte mesazhin publik.
Duhet thënë se dalja e djeshme e Donald Lu ishte e para pas një mungese të gjatë në publik, ku thuajse çdo herë ai fliste për Reformën në Drejtësi.
Një burim diplomatik i tha tesheshi.com se mungesa e këtyre deklaratave është se tashmë nuk ka ndonjë gjë për të thënë, pas bllokimit të Vetingut.
Uashingtoni dhe Brukseli po mendojnë për planin B të zhbllokimit të procesit dhe ecjen përpara të ndërtimit të institucioneve të reja, të parat Prokurorinë Speciale dhe Byronë Kombëtare të Hetimit. /tesheshi.com/
