Lulzim Basha ka rënë dakord dje gjatë një takimi në Romë me Kryetarin e Parlamentit Europian dhe eksponent i lartë i Partive Popullore Europiane që të arrihet një marrëveshje me ndërmjetësimin e këtij formacioni politik, ku aderon dhe PD-ja, ditën e hënë kur në Tiranë do të mbërrijë trioja e kryesuar nga negociatori e Angela Merkelit, Davit Mcallister, kryetar i Komisionit të Jashtëm të Parlamentit Europian.
Së bashku me Mcallister do të vijnë edhe dy reporterët: Knut Fleckenstein dhe Eduard Kukan.
Një burim diplomatik i tha tesheshi.com se i dërguari i PPE-së do të vijë me një dokument të gatshëm në Bruksel i cili i ofron opozitës një arritje të rëndësishme.
Sipas paktit, opozita vendosë të hyjë në Parlament menjëherë, merr pjesë në zgjedhjen e Presidentit të Republikës dhe votimin e komisionit të Vettingut.
Si kompromis ofrohen dy variante:
1.Shtyrja e zgjedhjeve me vetëm 25 ditë, pra në korrik, ku Presidenti Bujar Nishani do të dekretojë një datë të re të zhvillimit të tyre dhe në votime shkohet me Presidentin e ri të zgjedhur por që do të betohet në Parlamentin e ri.
2.Zgjedhjet mbahen më 18 qershor dhe deri atëherë formohet një qeveri e mbështetur nga palët e cila do të jetë e komisaruar nga ndërkombëtarët, përkatësisht SHBA dhe BE.
Detajet e këtij dokumenti nuk bëhen të ditura pasi janë ende në diskutime.
Por mund të thuhet se situata mund të shkaktojë komplikacione në rregullsinë kohore të përgatitjes së procesit nga KQZ, i cili megjithatë i ka marrë të gjitha masat, përveç regjistrimit të koalicioneve dhe partive opozitare.
Siç mësohet, menjëherë pas firmosjes së marrëveshjes nga Basha e Rama, PD dhe aleatët e saj do të pranojnë regjistrimin në zgjedhje. Por kjo gjithmonë nëse pranon.
Ditën e djeshme në Romë, Bashës i është dhënë paralajmërimi i fundit që nëse nuk tregohet fleksibël atëherë do të ecet me planin normal dhe ku mosmarrja pjesë e PD-së në zgjedhje nuk do të cilësohet si problem politik por thjeshtë si vullnet i saj.
Pasditen e 24 prillit, kreu i Komisionit të Jashtëm të Parlamentit Europian, njeriu i kancelares Angela Merkel dhe nënkryetar i PPE, David McAllister vjen në Tiranë. Ndërsa më 25 prill do nisë diskutimet me palët. Njeriu i Merkel do të vijë me një marrëveshje të gatshme, e cila do u vendoset në tavolinë Ramës edhe Bashës dhe ata duhet të bien dakord mbi pikat që përcaktohen aty. Mësohet se dokumenti që do t’u vendoset palëve në tavolinë po hartohet nga faktori ndërkombëtar dhe në këtë proces nuk është përfshirë vetëm Bashkimi Europian por edhe SHBA.
Mbërritja e David McAllister në Tiranë, shihet si një mundësi për zgjidhjen e situatës politike dhe arritjen e një marrëveshjeje për kthimin e opozitës në Parlament e futjen e saj në zgjedhjet parlamentare.
Në mes të javës së kaluar, McAllister u përzgjodh si negociator për arritjen e një marrëveshje e pak ditë më vonë edhe dy aleatët në qeverisje, Edi Rama e Ilir Meta deklaruan se një negocim nga Partitë Popullore Europiane do të ishte i mirëpritur.
Bojkoti i PD-së ka bërë që ndërkombëtarët të reagojnë shumë ashpër ndaj saj. Pak ditë më parë, shefja e Politikave të Jashtme të Bashkimit Evropian, Frederica Mogherini, lëshoi një mesazh të qartë kundër bojkotit, kundër pengimit të Reformës në Drejtësi dhe theksoi se moszbatimi i kësaj reforme po ngadalësonte integrimin e Shqipërisë. Edhe personazhe të tjerë nga faktori ndërkombëtar kanë reaguar kundër bojkotit dhe protestës së opozitës si edhe ndaj kushtit të vetëm të saj, krijimin e një qeverie teknike.
Me anë të Maja Koçijançiç, zëdhënëse e Komisionit Europian, BE theksonte se Parlamenti duhet të jetë funksional edhe për ecurinë e mëtejshme të zbatimit të Reformës në Drejtësi. “Për ne, debati politik duhet të zhvillohet brenda parlamentit dhe jo jashtë tij. Polarizimi i mëtejshëm i arenës politike do të ishte vetëm kundër-produktive për ambicjen e Shqipërisë për t’iu bashkuar Unionit Europian, madje edhe për avancimin në rrugën e saj europiane”, tha ajo.
Ndërsa eurodeputeti i djathtë, Eduard Kukan, i cili në 21 shkurt do të shkruante në Twitter se “opozita ka ende shumë punë për të bërë para zgjedhjeve, në Kuvendin e Shqipërisë. Bojkoti nuk e ndihmon atë t’i mbarojë këto punë”; duke i dhënë kështu Bashës një tjetër mesazh se është në rrugën e gabuar. /tesheshi.com/
