Nga Blendi Gashi
Ndonëse u paralajmërua se buxheti 2017-të mund t’i jap fund koalicionit qeverisës PDK dhe LDK, kjo nuk ndodhi.
Partia e Kadri Veselit përkundër pakënaqësive vendosi të jap votën pro dhe njëherit të mbaj edhe ca ditë në pushtet Isa Mustafën, por edhe veten, duke bërë që buxheti të kalojë në lexim të parë më 73 vota “pro” dhe 20 “kundër”.
Deputetë të PDK-së hodhën jo pak kritika duke thënë se ai lë shumë për të dëshiruar, për çka shprehën pakënaqësinë për mënyrën se si është bërë ndarja buxhetore.
Më i zëshmi nga PDK u shpreh deputeti Shukri Buja, i cili tha se buxheti i propozuar është rrezik me falimentu shtetin.
Ai tha se ky buxhet e kufizon buxhetin e veteranëve,dhe e përjashton ligjin veteranëve që të përcaktojë shumë e veteranëve.
Ai tha se ky buxhet është huamarrës i shpenzimeve rrjedhëse dhe nuk e mbron shtetin pasi nuk sjell investime për qytetarët e vendit, për çka kërkoi nga deputetët të mos e votojnë dhe t’ia kthejnë qeverisë.
Ndërsa deputetja e kësaj partie, Safete Hadërgjonaj, tha se buxheti nuk është 2 miliard siç po proklamon kryeministri e ministri i Financave Avdullah Hoti, por sipas saj është 1 miliard e 725 milionë euro.
Por përkundër vërejtjeve, ajo siguroi partnerin e koalicionit, pra LDK-në se PDK-ja do të votojë “pro”, gjë që sigurisht e lehtësoi Mustafën.
Nga ana tjetër, deputetja Hadërgjonaj, edhe pse pohoi në një mënyrë se kërkesat e partisë së saj janë plotësuar dhe janë bërë plotësim-ndryshimet, ajo nuk tregoi saktësisht se cila është ujdia që PDK përkundër pakënaqësive jo të pakta po e voton buxhetin.
Ja prapaskenat…
Portali tesheshi.com nga burimet e saj brenda PDK-së ka mësuar prapaskenat se çfarë në të vërtetë e shtyri këtë parti t’i thotë “po” buxhetit, por në të njëjtën kohë edhe për debatet që kanë ndodhur mes deputetëve të partisë së Veselit.
Arsyeja kryesore sipas burimit tonë pse PDK ka marrë vendim ta votojë buxhetin 2017 është që të mos mbetet fajtore për mosmiratimin e tij.
“Në të vërtetë ka pasur zëra kundërshtues brenda partisë që ky buxhet të mos votohet. Deputet të caktuar për më tepër kanë kërkuar edhe përgjegjësi nga ministrat e PDK-së pse kanë dhënë votën e tyre për në mbledhjen e qeverisë për buxhetin. Pasi është votuar në ekzekutiv është marrë vendim se duhet të votohet edhe në Kuvend sepse në të kundërtën PDK do të mbetej fajtore për mosmiratim të buxhetit”, ka thënë burimi.
Sa i përket kërkesave të miratuara të PDK-së, burimi shton se ato kryesisht janë për investime në komuna të caktuara ku udhëheq kjo parti.
“Po siç dihet pakënaqësia e PDK-së ka qenë për mënyrën si është bërë ndarja e buxhetit pasi ka konsideruar se i është ndarë më pak fond në komunat ku udhëheqë. Por, duhet thënë se më këtë buxhet më shumë përfitojnë sërish ministritë që udhëheq LDK se ato PDK.
Mund të them se pothuajse një numër jo i vogël i deputetëve të PDK-së janë të pakënaqur me buxhetin pasi konsiderojnë se ai është jo real dhe buxhet i huasë. Megjithatë, në fund janë dakorduar që ta votojnë vetëm e vetëm që të mos shkaktohet ndonjë krizë më e madhe politike , pra të mos bie qeveria pasi nuk është momenti”, thotë burimi.
Por sipas burimit në fjalë pas miratimit të buxhetit më nuk ka arsye që koalicioni qeverisës në vitin e ardhshëm të qëndroj në këmbë.
“Në vitin 2017-të në çdo moment mund të bie koalicioni. S’ka më asnjë arsye të vazhdohet koalicioni me LDK-në. Është gjë e ditur se ministrat e dy partive vështirë e shohin njëri-tjetrin në sy. Sa më parë të prishet aq më mire do jetë, por sigurit nuk do të mbijetoi deri më 2018”, thotë burimi.
Ndryshe, mospjesëmarrja e ministrave të PDK-së në seancën më të rëndësishme të vitit tregon qartë se këtij koalicioni qeverisës po i vjen fundi. /tesheshi.com/
