Elseid Hysaj paska qenë shumë pranë kalimit tek Juventus këtë verë. Lajmi ka dalë nga gazetari Antonio Korbo i gazetës “La Repubblica”, i cili në një intervistë dhënë për Canale 8, ka deklaruar se Juventus e Napoli, për shkak të mardhënieve të mira mes presidentëve Anjeli dhe De Laurentis, kanë diskutuar për një kalim të shqiptarit tek “Zonja e Vjetër”, për shifrën e 40 milion eurove.
“Mes Juves dhe Napolit ka një sinergji në nivel europian, presidentët komunikojnë për lojtarët, pavarësisht si duket në publik”, rrëfen Korbo.
Sipas tij, marrëveshja nuk është konkluduar pasi është diskutuar me trajnerin Sarri, i cili ka vënë veton se Hysaj është i paprekshëm.
Nëse negociata do të realizohej, mbrojtësi i djathtë i Kombëtares shqiptare, do të vendoste një rekord absolut për shifrat e shitjes, rekord që “si zor të thyhej” për shumë vite nga ndonjë shqiptar tjetër. /tesheshi.com/
