Gjatë bombardimeve të NATO-s mbi Serbi gjatë krizës kosovare, është folur shumë në atë kohë se brenda aleatëve kishte jo vetëm pakënaqësi, por edhe rrjedhje informacioni, madje prishje operacionesh ushtarake.
Dhe sot pas 18 vjetësh dalin në dritë disa aspekte të përçarjes së Aleancës, në një prej operacioneve më të bujshme të saj për t’i thënë ndal Millosheviçit. E kush tjetër veç një greku do ishte besëthyeri në radhët e NATO-s, për t’u qenë krah vëllezërve serbë, sidomos kur është fjala për shqiptarët përballë.
Admiral Marinos Ritsoudis, komandanti i anijes luftarake greke “Themistokliu”, shpjegon për të përditshmen serbe Blic se me vetëdije ka thyer urdhrin e krerëve të komandës aleate.
“Kisha një ndjenjë të qartë për ta mbështetur Serbinë kundër të gjithëve”, thotë admiral Ritsoudis për Blic.
Për këtë veprim, ushtaraku grek është gjykuar dhe ka ngrënë edhe burg.
“Jam shumë krenar që bëra pjesën tim për popullin serb. Ne ndajmë të njëjtën kulturë dhe histori dhe kam gjetur këtu miq të mirë dhe ndajmë kujtime të përbashkëta”, thotë ushtaraku grek ndërsa ndodhet në mes të disa radikalëve serbë, në një tavolinë të mbushur me me alkol.
“Ishte fantastike të marrësh një vendim që mbështeta një komb që lufton kundër një armiku më superior”, thotë admirali grek që dukshëm ndodhet në një situatë më entuziaste se duhet.
Vendimi që mori i shkatërroi karrierën; u përjashtua nga ushtria ddhe tani punon si kapiten në një jaht, por edhe bëri ca kohë burg.
“Në fakt nuk ishin shumë por rreth një javë. Më pas avokatët e mij e çuan çështjen në apel dhe më liruan”, saktëson ai.
Ambasada serbe në Greqi ka kontaktuar admiralin duke i bërë të ditur që të pranojë një dekoratë të lartë të shtetit serb.
“I thashë atyre se nuk dua asgjë, gjithçka e bëra nga dashuria për popullin serb dhe nga inati për vendet e NATO-s”, thotë Routsidis.
Admirali u dënua nga një gjykatë greke me 2 vjet e gjysëm burg por që faktikisht bëri vetëm një javë.
Përgatiti Ylli Pata – /tesheshi.com/
