Kjo është fushata më paqësore mes dy partive të mëdha pasi nënshkruan një pakt bashkëpunimi dhe bashkëqeverisje në fillim të Majit. Por, ashtu siç flitet, duket se pakti do t’a shtrojë ndikimin edhe pas zgjedhjeve të 25 qershorit.
Dy firmosësit, Edi Rama dhe Lulzim Basha nuk e pranojnë këtë, por ministri i Jashtëm, Ditmir Bushati, e artikuloi zgjatjen e paktit si një bashkëpunim për hir të integrimit.
“Shqipëria është në një fazë vendimtare sa i takon fillimit të zbatimit të reformës në drejtësi dhe në rast se ne i përmbahemi asaj marrëveshje të rënë dakord me kryeministrit Rama dhe kryetarit të PD Basha, pas zgjedhjeve të 25 qershorit do të vijojmë jo thjesht me zbatimin e mëtejshëm të reformës në drejtësi, por do të kemi mundësi për të pasur pritshmëri nga vendet anëtare të BE për të filluar procesin sfidues të anëtarësimit në BE”, deklaroi Bushati për Top-channel.
Ai e bëri deklaratën në Berlin, ku mori pjesë në Konferencën e Ministrave të Jashtëm të Europës Juglindore, takim i thirrur nga kryediplomati gjerman Sigmar Gabriel.
Mbetet për t’u parë se si do të konkretizohet ky bashkëpunim pas zgjedhjeve, ndërkohë që PD-ja ka marrë gjysmën e ministrave të qeverisë aktyuale dhe drejtimin e disa agjencive dhe drejtorive më rëndësi./tesheshi.com/
