Ministrja e Arsimit, Lindita Nikolla në një deklaratë për publikun, njoftoi se maturantët që janë shpallur fitues në raundin e parë do të mund të regjistrohen nga data 13 shtator. Duket se regjistrimet do të nisin pa u sqaruar përfundimisht problematika e krijuar ditët e fundit, kur edhe maturantë me mesatare të mirë, kanë mbetur pa u pranuar në universitet.
Sipas ministres Nikolla, maturantët e tjerë nuk do të mbeten pa ndjekur studimet, duke shtuar se maturantët e raundit të dytë mund të dalin sërish në 10 degë fitues.
“Procesi është transparent”, tha ministrja, duke shtuar se më të mirët kanë të drejtë të zgjedhin.
“Ankimimet janë shqyrtuar nga institucionet e arsimit të lartë në vend dhe maturantët kanë marrë përgjigje. Jemi në komunikim të vazhdueshëm dhe të pandërprerë me të gjithë institucionet e arsimit të lartë në vend. Besoj që është rasti për të treguar me impaktin e parë të këtij procesi të parë se si autonomia institucionale është vënë në funksion”, tha ajo.
Duke iu drejtuar maturantëve, Nikolla tha se gjithçka do të vijojë në bazë të udhëzimi nr. 13. “Pra, ju fituesit e raundit të parë do të fillojnë regjistrimet në degën që ju preferoni në datën 13 shtator. Raundi i parë mundësoi që më të mirë të zgjedhin të parët. Pa dyshim, edhe për të gjithë të tjerët mundësoi një pamje reale, të qartë për ta bërë meritën dhe preferencën tuaj fituese”, shtoi ajo. /tesheshi.com/
