Një mik i veçantë do ta ndiqte mbrëmë Interin në “Giuseppe Meazza”. Jose Mourinho u kthye të shihte ekipin që thuajse para gjashtë vitesh e la kampion, i gjendur nën shoqërinë e ish-presidentit të klubit, Massimo Moratti-t, mbështetësit të tij më të madh, ish-kapitenit Javier Zanetti, e, pak më tutje, të brazilianit Ronaldo.
Me praninë e tij në fushë si një inkurajim, Interi do t’u kthehej sërish fitoreve, me një 3-1 bindës ndaj Sampdorias. Tre pikë të çmuara për skuadrën që po vuan prej javësh.
Goli i parë i ndeshjes për vendasit do të vinte në minutën e 23-të, i shënuar nga D’Ambrosio, për t’u
pasuar nga dy të tjerë në pjesën e dytë të lojës. Miranda dhe Icardi do të ishin shënuesit e tyre. Në të 92-ën minutë Quagliarella thjesht do të ngushtonte diferencën për Sampdorian, me një gol ngushëllues dhe për të.
Trajneri i Interit, Roberto Mancini, do të shprehej i lehtësuar pas ndeshjes: “Duke patur parasysh momentin e vështirë, jam i kënaqur.” Por duke kujtuar në të njëjtën kohë se, “Momente delikate si ky nuk kapërcehen me një fitore.”
“Çfarë më jep shpresë janë tre pikët. E sa i përket lojës së zhvilluar, mund të bëjmë më shumë. Por mendoj se na duhen ca fitore për të kthyer vetëbesimin,” ka vijuar Mancini.
Interi mban vendin e katërt në renditjen e kampionatit italian, me dhjetë pikë më pak se Juventusi i vendit të parë. /tesheshi.com/
