Lëvizja Vetëvendosje përmes një njoftimi për media ka bërë të ditur se në qytetin e Vushtrrisë, pranë pikës ku po mblidhen nënshkrimet e qytetarëve, ka një prani të panevojshme policore. Këtë prani, lëvizja e cilëson presion mbi qytetarët që dëshirojnë të nënshkruajnë peticionin e opozitës kundër marrëveshjeve me Brukselin.
“Qëndrimi i policëve po vazhdon, dhe kjo gjë po i bën qytetarët që të hezitojnë të afrohen për të nënshkruar. Një gjë e tillë po ashtu po shkakton irritim tek njerëzit që megjithatë po përfshihen në peticion,” thuhet në njoftimin e Vetëvendosjes.
Lëvizja Vetëvendosje konsideron se prania e policisë në vendin ku nënshkruhet peticioni i opozitës nuk është tjetër vetëm formë e sofistikuar e presionit ndaj qytetarëve. /tesheshi.com/
