Dhjetë muaj negociata të ethshme kanë përfunduar me një marrëveshje mbi tavolinë që pret vetëm të nënshkruhet, për një ndihmë ushtarake dhjetëvjeçare për Izraelin nga SHBA-të.
Marrëveshja, më e madhja në historinë e SHBA-ve, parashikon një shifër rekord, 38 miliardë dollarë, të ndihmës ushtarake për Izraelin në dhjetë vitet e ardhshme.
Kështu, duke iu referuar BBC-së, ndihma amerikane për izraelitët rritet nga 3.1 miliardë dollarë në vit që është aktualisht, në 3.8 miliardë dollarë. Veç të tjerash, Izraeli do të marrë në vit 500 milionë dollarë për programet e mbrojtjes raketore.
Kjo marrëveshje parashikon dhe lëshimet nga pala izraelite. Përveç asaj që garantohet për çdo vit në paketën e re të ndihmës, Izraeli nuk do mund të kërkojë fonde shtesë nga Kongresi Amerikan. Gjithashtu, Izraeli do duhet t’i shpenzojë fondet nëpërmjet industrisë amerikane të mbrojtjes, e jo përmes kontraktorëve të tij ushtarakë.
Marrëveshja e re, e cila zëvendëson një paketë dhjetëvjeçare ndihme që përfundon në 2018-tën, pritet të nënshkruhet sot në Uashington.
Nënshkrimi i kësaj marrëveshjeje vjen në një kohë kur ka një pakënaqësi të administratës së Obama-s për përshpejtimin e ndërtimit të ngulimeve izraelite në tokat palestineze. /tesheshi.com/
