Formula 1 po bëhet gati të nisë sezonin e ri, me shumë pikëpyetje përpara. Në Barcelonë është mbyllur java e parë e provave, ku kanë spikatur njëvendëshet Mercedes e Ferrari.
Ndryshimet teknike i kanë bërë makinat më të shpejta, çka lë vend për surpriza në garat e para, ashtu siç ndodh çdo sezon. Megjithatë, nga provat e javës së shkuar kanë dalë disa konkluzione.
Sipas drejtuesit të Red Bull-it, Christian Horner-it, dy konstruktorët e përmendur më sipër janë më
përpara të tjerëve, gati në një nivel tjetër.
“Ferrari është shumë i shpejtë, dhe duket shumë i qëndrueshëm në pistë. Mercedes-i është ende shumë përpara. E shoh Bottas-in pak më poshtë Hamilton-it, gjë që është e kuptueshme, ndërsa ai duhet të ambientohet me mjedisin e ri.”
Ish-kampionët Vettel e Raikkonen bënë paraqitje mjaft të mira javën e shkuar, ndërkohë që kohë më të mira arriti të regjistrojë vetëm Mercedes-i.
Ferrari është dëshpërimisht në kërkim të kthimit të ditëve të lavdishme, që mungojnë prej vitesh. Ferrari nuk e fiton titullin e konstruktorëve që nga 2008-ta. Ndryshe ngjet me Mercedes-in, që dominon plotësisht në tre sezonet e fundit.
Gara e parë sezonale është ajo e Australisë, më 26 mars. /tesheshi.com/
