Nga Mensur Krasniqi
Prag-fushata elektorale në Maqedoni është shoqëruar me një zhvillim të pazakontë. BDI, partia shqiptare në aleancë qeverisëse me VMRO-në e Gruevskit, ka vendosur të distancohet prej saj, por vetëm në sllogan duke zgjedhur që “Fillojmë” ta zëvëndësojë me “Bashkë vendosim”. Deri më tani, BDI kishte zgjedhur që në emër të aleancës politike të kishte të njëjtin sllogan: në zgjedhjet e vitit 2014 VMRO doli me “Veteno-Storeno” e po ashtu dhe BDI me “U tha u Bë” (përkthimi shqip). Edhe në këto zgjedhje, këto dy parti sërish dolën me sllogan të njëjtë: njëra “Nie pocnuvame” e tjetra “Fillojmë” (përkthimi shqip).
Por ja që ndoshta presioni i madh i opinionit ka bërë që kjo parti të pavarësohet nga aleati maqedonas.
“Bashkë vendosim” është një vendim i marrë së fundi shtabi zgjedhor, që sipas krerëve të kësaj partie do të jetë përfaqësuesja e fuqishme dhe serioze e shqiptarëve, për të cilët, pas shumë arritjesh, ka ardhur koha që të jenë plotësisht të barabartë në përparimin ekonomik të vendit.
“Do të bëjmë fushatë pozitive duke folur për projektet që kemi arritur dhe planet për të ardhmen. Ne jemi gati të komunikojmë me qytetarët, sepse kemi çka të tregojmë, çka kemi premtuar dhe çka kemi realizuar. Ky është programi ynë elektoral, por më shumë se aq, është përcaktim politik dhe një rrugë me vizion afatgjatë drejt objektivave të përparimit në një ekonomi perëndimore” u shpreh Bekim Neziri, shef i shtabit zgjedhor, në njëri nga tubimet e BDI-së, aty ku dhe u promovua sllogani i ri.
Dhe nuk kanë munguar reagimet, duke paralajmëruar kështu se ky ndryshim, kjo kthesë, kjo zgjedhje, kjo taktikë mund te t’i shndërrohet në bumerang partisë së Ali Ahmetit, duke u marrë si akt dobësie dhe mungese kreditesh besueshmërie.
Ndër reagimet e para ka qenë i ai aktivistit të njohur nga Shkupi, Bekim Berisha, që edhe slloganit të ri ia ka gjetur bishtin. Ai ka ironizuar duke thënë se gjithnjë ka menduar që BDI e vetme ka vendosur për të këqijat që ia solli popullit shqiptar, mirëpo se përgjegjësinë e kanë ndarë ndërmjet tyre, nuk e kishte ditur.
“Gjatë gjithë kohës, kam menduar se VMRO-ja pa e pyetur BDI-në, vendos për gjitha të zezat ndaj shqiptarëve. POR, sot po i shohim këta të BDI-së se si na paraqiten me sloganin e rradhës “bashkëvendosim”!! Po për çfarë paskeni vendosur bashkë me VMRO-në?!
- Për mos anëtarësimin e vendit në NATO?!
•Për prishjen e marëdhënieve fqinjësore me të gjitha shtetet për rreth, PËRVEQ se me shtetin tuaj “amë” Sërbinë?!
•Për ndarjen buxhetore skajshmërisht diskriminuese ndaj shqiptarëve?!
•Për projektin skizofrenik “Shkupi 2014”, ku mes përmendoreve tjera, qëndron edhe përmendorja e kryeteroristit car lazarit, të cilit sërbo-sllavët i thurrin vargje lavdie sepse masakroi mijëra shqiptarë?!
•Për kishën në Kala të Shkupit?!
•Për “Monstrën”?!
•Për Kumanovën?!
•Për angazhimin në tetë komisione qeveritare të derrit fashist i cili në emisionet e tija i ofendon shqiptarët?!
•Për gjendjen e mjerueshme të vendbanimeve ku shumica janë shqiptarë, në favor të atyre me shumicë maqedone të cilat u përngjasojnë vendeve Europiane?!
•Për shpjegimin zyrtarë nga MPB-ja, për rastin e të ndjerit Harun Aliu?!
•Për lirimin e vrasësit të të ndjerit Komandant Shqiponjës?!
•Për maltretimin e të burgosurve të rastit të Kumanovës?!
•Për diskriminimin ekstrem ndaj shqiptarëve në administratën shtetërorë?!
Për, për, për….?!”,
PËR QFARË DREQIN JU BASHKËVENDOSNI?! Dhe me KË bashkëvendosni?! Ju në BDI me këtë slogan, vetëm se po na e bëni me dije se edhe më tutje planifikoni të bashkëvendosni me VMRO-në, kundër interesave shqiptare!
Hiq dert mos e keni se bashkë me VMRO-në, do të theni qafën në zgjedhjet e ardhëshme!!!”, ka shkruar Bekim Berisha. /tesheshi.com/
