Euro 2016 afrohet, e ndeshjet përgatitore janë thuajse në fundin e tyre. Mbrëmjen e së shtunës u luajtën gjithashtu një varg miqësoresh të skuadrave pjesëmarrëse në Europian, ku dallon fitorja tenistike e Kroacisë ndaj San Marinos.
Në takimin e luajtur në Rijekë, kroatët e kishin marrë seriozisht miqësoren, edhe pse përballë kishin një kundërshtar më se modest, siç është San Marino. Me thuajse formacionin më të mirë në fushë, Kroacia fitoi 10-0. Gjashtë prej golave u shënuan në pjesën e parë.
San Marino nuk arriti për asnjë çast të rrezikonte. E mbajti topin vetëm në 30 për qind të lojës, gjuajti një goditje nga këndi, e nuk çoi asnjë top drejt portës kroate, qoftë jashtë apo brenda kuadratit.
Për fituesit shënuan nga tre gola Mandzukic dhe Kalinic, e nga një gol realizuan Pjaca, Srna, Perisic dhe Rakitic.
Franca shënoi fitoren e katërt radhazi, duke mposhtur 3-0 Skocinë. Protagonisti i kësaj miqësoreje ishte sulmuesi i Arsenalit, Olivier Giroud, i cili shënoi dy herë në pjesën e parë. Edhe pse i fishkëllyer në takimin e shkuar, Giroud ka treguar rritje të vazhdueshme në lojën e tij, me shtatë gola të realizuar në pesë takime. Duket se ai do të jetë zgjedhja e parë në sulm në Euro 2016 e Didier Deschamps-it.
Po në pjesën e parë u shënua dhe goli i tretë. Koscielny vulosi rezultatin në minutën e 39. Skocia, në anën tjetër, nuk është se bëri ndonjë rezistencë të madhe, e shumë pak tentoi të shihte nga porta kundërshtare.
Franca ka fituar në të katër ndeshjet e këtij viti. Më 25 mars fiton 2-3 ndaj Holandës, katër ditë më vonë mposht Rusinë 4-2, më 30 maj kalon me vështirësi Kamerunin, 3-2, e më 4 qershor mbizotëron bindshëm ndaj Skocisë, duke fituar 3-0.
Ndryshe është shfaqur Gjermania në katër miqësoret e këtij viti, me dy fitore e dy humbje. Në mars do të humbiste 2-3 me Anglinë e do të fitonte 4-1 me Italinë. Një tjetër humbje do të pasonte në fund të majit, ndaj Sllovakisë, 1-3.
Për të ardhur te miqësorja e fundit, e mbrëmshmja, ndaj Hungarisë, e fituar 2-0. Rezultati do të zhbllokohej nga një autogol i Lang-ut në minutën e 39-të. Müller do ta gjente rrjetën në minutën e 63-të, edhe pse Gomez që i përcolli topin u duk të ishte në pozicion jashtë loje.
Gjermania luajti me një formacion më pranë atij të vërtetit, por sidoqoftë eksperimentoi në mbrojtje, posaçërisht në qendrën e saj, ndërsa Mustafi e Hummels nuk u aktivizuan fare.
Në dy miqësore të tjera, Austria u mposht 0-2 nga Holanda, e Sllovakia me Irlandën e Veriut u ndanë në paqe, 0-0. /tesheshi.com/
