Mbledhja disaorëshe e grupit parlamentar të PD-së nuk ka lëvizur asgjë nga ultimatumi disajavor i Bashës për të dalë nga çadra e futur në zgjedhje me kushtin e largimit të Ramës dhe krijimit të qeverisë teknike. Pra, si zërat e kundër e si ndërhyrja e lidershipit të PPE-së me videokonferencë nuk kanë dhënë asnjë rezultat.
Basha, në një prononcim pas mbledhjes, ia ka adresuar fajin për këtë, pikërisht Edi Ramës.
“Qeveria teknike është zgjidhje për ne deri më sot, nëse ka zgjidhje të tjera atëherë jemi të gatshëm t’i diskutojmë. Ofrova pushtetin dhe mundësitë e mia personale, gjithçka, me qëllim e vetëm arritjen e një marrëveshje politike që do të siguronte votën e lirë të shqiptarëve, por deri më sot nuk kemi pasur deri më sot asnjë propozim të vetëm nga qeveria dhe kryeministri”, theksoi Basha.
“Nuk kemi kërkuar dhe nuk e pranojmë pushtetin në tavolinë. Në negociata shkojmë vetëm me kërkesën për qeveri teknike dhe pa Edi Ramën kryeministër. Largimi i tij mjafton për t’i hapur rrugën një qeveria teknike. Ai mban peng një komb të tërë…”, u shpreh kreu i opozitës.
Ndërkohë, dihet tashmë dhe përgjigja e kryeministrit për këtë rast, atë që e ka artikuluar shpeshherë: nëse kërkohet largimi im, atëherë për çfarë duhet të negociohet? /tesheshi.com/
