Linda Brown, përpjekjet e së cilës për t’u regjistruar në një shkollë me nxënës të bardhë, e që sollën pas shumë përpjekjesh vendimin historik pro të drejtave civile në Amerikë, ka ndërruar jetë në moshën 76-vjeçare.
Si një fëmijë afro-amerikan, Brown iu ndalua të ndiqte shkollën fillore në Topeka, Kansas në vitin 1951. Babai i saj u bë mbështetësi kryesor dhe drejtuesi i padisë së familjeve që argumentonin se ideja e “të ndarë, por të barabartë” shkelte të drejtat civile të afro-amerikanëve.
Në vitin 1954, vendimi i gjykatës së Lartë për çështjen “Brown kundër Bordit të Arsimit” i dha fund egregacionit në shkollat e Shteteve të Bashkuara.
Pavarësisht se jetonte pak rrugë më tej nga shkolla fillore Sumner, Lindës iu refuzua regjistrimi dhe iu tha të shkonte në një shkollë afro-amerikane, dy milje më tutje. Për një nëntëvjeçare, kjo do të thoshte të kalonte shinat e trenit dhe të merrte e vetme autobuzin.
Babai i saj, Oliver Brown, u bë një nga 13 paditësit që sollën para gjykatës çështjen kundër bordit të shkollës në Topeka.
Fillimisht, çështja ngeci, por më pas ai u bashkua me sfidën ligjore kombëtare nga Shoqata Kombëtare e Avancimit të njerëzve me Ngjyrë, (NAACP) në emër të familjeve nga disa shtete amerikane.
Ata shpresonin të rrëzonin vendimin e vitit 1896 “Plessy kundër Ferguson” që sanksiononte ligjërisht idenë e mjediseve të ndara shkollore në bazë të racës. Aktivistët e të drejtave civile argumentuan se kjo ishte diskriminuese për shkak se shkollat afro-amerikane shpesh kishin ndërtesa të vjetra dhe me mungesa të shumta.
Në një intervistë të vitit 1985, Linda Brown tha se i ati e mori përsipër sfidën për shkak se “ndjente se ishte e gabuar që njerëzit me ngjyrë të pranonin të ishin qytetarë të dorës së dytë”.
Çështja e NAACP u drejtua nga avokati, Thurgood Marshall, i cili më pas u bë gjyqtari i parë me ngjyrë në Gjykatën e Lartë.
Në vitin 1954, gjykata vendosi unanimisht se segregacioni në shkolla ishte “pabarazi” dhe kishte një “ndikim të dëmshëm” mbi fëmijët afro-amerikanë.
Vendimi u prit me rezistencë dhe ndryshimi nuk ndodhi kudo, menjëherë.
Në disa shtete, autoritetet lokale refuzuan të binden, gjë që solli konfrontime publike si në Little Rock, Arkansas.
Në moshë të rritur, Linda Brown foli është për vështirësitë e kapjes së vëmendjes kombëtare në një moshë të njomë, por ajo vijoi të sfidonte segregacionin në shkolla në jetën e saj të mëpasshme.
Në një postim në rrjetet sociale, NAACP e cilësoi atë “heroinë për kombin tonë”.
Jeff Colyer, guvernatori i Kansasit vlerësoi Linda Brown duke shkruar: “Jeta e saj na kujton se ndonjëherë njerëzit më pak të privilegjuar mund të kenë ndikim të pabesueshëm dhe se duke i shërbyer komunitetit tonë ne mund të ndryshojmë vërtet botën”.
Përgatiti: Juli Prifti – /tesheshi.com/
