Në një postim të fundit në X mbi atë çfarë po ndodh në Gaza, kryeministri Rama nuk ka gjetur dot asnjë fjalë për genocidin izraelit aty, kryer qartazi faqe botës, nën dritën e hënës dhe të diellit, me “mandat” perëndimor.
“Ndërsa qëndrojmë me vendosmëri me Izraelin kundër Hamasit, ne jemi gjithashtu shumë të shqetësuar për vuajtjet e civilëve dhe shkatërrimin në Gaza. Është thelbësore t’i jepet fund këtij konflikti përpara se ai të përshkallëzohet më tej dhe të dalë jashtë kontrollit. Shqipëria mbështet thirrjen e Presidentit Biden për një pauzë humanitare”, shkruan ai si parathënie e lajmit se do marrë pjesë në një forum paqeje në Paris mbi atë çfarë po ndodh në Lindjen e Mesme.
Dhe sipas tij, “në këmbim të një armëpushimi të menjëhershëm, Liga Arabe dhe Turqia duhet të sigurojnë lirimin e pakushtëzuar dhe të sigurt të të gjithë pengjeve të mbajtura nga Hamasi”.
“Pas krimeve të tmerrshme të kryera më 7 tetor, nuk mund të ketë të ardhme politike për Hamasin. Sipas një mandati të OKB-së, një forcë ndërkombëtare e udhëhequr nga Liga Arabe mund të marrë përkohësisht kontrollin e Gazës, duke lehtësuar një kalim të përgjegjësive qeverisëse nga Hamasi te Autoriteti Palestinez. Së shpejti do të bashkohem me liderët e tjerë botërorë në Forumin e Paqes në Paris, ku do të diskutojmë mënyrat për rivendosjen e paqes në Lindjen e Mesme”, shkruan Rama, i cili më gjasë nuk i beson as vetë ato që thotë, ndonëse shumë herë këmëngul për të kundërtën e pohimeve të tij në politikë dhe qeverisje.
I duhet thënë të parit të qeverisë së në debat nuk është Hamasi, edhe pse aktor me peshë në zhvillimet dramatike të Gaza-s përballë një shteti të cilësuar si apardeit nga shumë organizata humanitare në botë; në debat është projekti i fshehur, por dhe i qartë nëse ka sy për ta parë, për ta fshihë njëherë e mirë Gaza-n në forma genocidale. /tesheshi.com/
