Kryeministri Rama njoftoi mbi gadishmërinë e miqve ndërkombëtarë për të ofruar menjëherë ndihmë në këto çaste të vështira që po përjeton Shqipëria, pas një tërmeti me pasoja rënë në mesnatë, ku janë shënuar dhe viktima.
“Të gjithë miqtë e Shqipërisë po aktivizohen me shpejtësi Kryeministri Conte e kryeministri Mitzotakis nisën avionët me skuadrat speciale. Presidenti Macron e Presidenti Erdogan më shprehën gatishmërinë për çdo nevojë. Ambasadat e BE/SHBA kanë njoftuar qysh herët gatishmërinë.
Qysh herët më ka telefonuar edhe Presidenti Thaçi, i cili ka aktivizuar skuadrat speciale të FSK drejt zonave të krizës emergjente për nxjerrjen e njerëzve ende nën rrënoja. Vazhdojnë kontaktet, ndërkohë që në terren po bëhet gjithçka e mundur në pikat ku kushtet janë më të rënda”, shkruan Rama.
Nga ana tjetër, kryeministri në ikje i Kosovës, Ramush Haradinaj, njoftoi se po mobilizon njësitë e emergjencave në ndihmë të Shqipërisë.
“Sapo kam zhvilluar një bisedë telefonike me Presidentin Ilir Meta, të cilit i shpreha solidaritetin dhe gatishmërinë e popullit të Kosovës për të ofruar tërë ndihmën e nevojshme për të përballuar këtë situatë të rëndë në Shqipëri. Kam kërkuar nga Gjenerali Rrahman Rama, Drejtori i Policisë Rashit Qalaj, që të mobilizojnë të gjitha njësitet emergjente për t’i dalë në ndihmë shtetit dhe qytetarëve të Shqipërisë me të gjitha kapacitetet e nevojshme”.
Në Thumanë, aty ku është dhe vatra kryesore e tragjedisë, me pallate të shembura e njerëz nën rrënoja, mbërriti dhe shefi i opozitës Basha, i cili ftoi njerëzit që të ruajnë qetësinë e mos kapen nga paniku. /tesheshi.com/
