“Do t’i japim fund historisë së akumulimit të borxheve që fatkeqësisht na shoqëroi edhe në këtë periudhë për shkak supervizorësh të papërgjegjshëm e për shkak të një administrimi të papërgjegjshëm të Drejtorisë së Rrugëve. Ne kemi filluar proceset penale për të gjithë ata supervizorë dhe zyrtarë të përfshirë në këtë dëm ndaj buxhetit të shtetit dhe në këtë shkelje flagrante të ligjit të Buxhetit të Shtetit. Do të vazhdojmë të çojmë përpara drejtësisë këdo prej tyre që kanë marrë pjesë në këtë shkelje të patolerueshme. Buxheti i shtetit miratohet nga Parlamenti. Nuk ka supervizor dhe nuk ka zyrtarë ARRSH apo SHSH-je që mund të hapë buxhet me firmën e tij, duke i ngarkuar borxhe qeverisë dhe vetë publikut dhe duke bërë sikur s’kupton, ndërkohë që ligji i Buxhetit është shumë i qartë dhe ka kufij të pakapërcyeshëm nga askush, as nga vetë qeveria, pa shkuar më parë në Parlament, për të lëvruar më shumë para nga thesari i shqiptarëve” – kështu deklaroi këtë të mërkurë kryeministri Rama, teksa foli gjerë e gjatë mbi investimet në infrastrukturë për vitin 2018.
Bëhet fjalë pra për ish-zyrtarë të LSI-së, pjesë e “tepsisë” nëse flasim me gjuhën e tij, ku edhe pse shefi i mazhorancës nuk e ka përmendur konkretisht si akronim – pra LSI – kë lënë të kuptuar se e ka pikërisht me ata, gjersa dhe Drejtoria e Rrugëve ka qenë e tyre, e Metës pra.
Në fakt, po të shihet më vëmendje, që nga mbarrimi i fushatës, Rama nuk e ka patur pjesë të ligjërimit të tij LSI-në dhe nuk ka përmendur në ndonjë rast eksponentë problematikë të saj, si për korrupsion e si për afera kriminale, paçka se gjuha nga ana tjetër, ajo e partisë nën drejtimin e znj. Kryemadhi, nuk ka rreshtur për asnjë çast, sidomos tani me Tahirin si lëndë e parë, e cila është rënduar akoma dhe më tepër. Nuk është përmendur Klemend Balili përshembull, apo Artur Mahmutaj, ish-nr.2 i Hekurudhave, i sapokapur si trafikant droge, figura të LSI-së. Këtë gjë PS mund ta bënte lehtësisht, edhe si vijim i denoncimit të “tepsisë”, por ja që ka zgjedhur një formë tjetër ndëshkimi, e diskretitimi po ashtu, kuptuar nga ajo çfarë tha Rama për zyrtarët lësëistë të Drejtorisë së Rrugëve. Ndaj tyre, si në çdo sektor tjetër që ishin porcione tepsie të Metës, po ushtrohet një auditim i imtësishëm, një hetim më saktë, për të evidentuar të gjitha shkeljet e abuzimet në katër vitet e aleancës me PS-në, për t’i ekzekutuar më pas penalisht, jo tek zyrat e sotme të Adriatik Llallës por në selinë e SPAK-ut, që pritet të instalohet aty ku sot është Gjykata e Krimeve të Rënda dhe në të ardhmen do të quhet “Gjykata Speciale”.
Tashmë në këtë situatë ne kemi një panoramë të tillë: qeveria e Edi Ramës, në mandatin e parë ka dërguar në prokurori pjesën më të madhe të ministrave dhe zyrtarëve të PD-së, ndërsa në mandatin e dytë po e bën me ata të LSI-së.
Ndërkohë, Prokuroria, deri tani ka mbyllur të gjitha dosjet e dërguara nga qeveria dhe ka hapur dosjen e Saimir Tahirit, për të cilin kërkoi madje edhe arrestimin e tij të menjëhershëm.
Por ku ka çuar kjo gjendje me dosje pafund për njëri-tjetrin? Në relativizimin e akuzave për korrupsion, duke e çuar çështjen thjesht në nivelin propagandistik. Kjo ka ardhur vetëm si pasojë e moskrijimit kurrë nga Prokuroria shqiptare të një dosje mbi korrupsionin e zyrtarëve.
Edhe kur ka pasur raste të tilla, ato janë gjykuar si çështje të ndara, si ajo e Spiro Kserës, që menjëherë pasi është mbyllur me dënimin e tij, është arkivuar më pas duke mos e lidhur të plotë të gjithë zinxhirin zyrtar të korrupsionit. Kjo ka ardhur thjesht për një arsye sepse hetimi është mbyllur që nga maja e piramidës, duke mos e çuar në themel.
Më e fundit ishte rasti CEZ. Pa asnjë verifikim paraprak, Prokuroria kërkoi pushimin e çështjes, kur thjesht për kujtesë flitej për nxjerrje brenda ditës nga një bankë të 7 milionë eurosh cash, ndërkohë që sot rasti “Sota-Tahiri” flet për 800 mijë euro.
Nëse dosja nuk mbyllet, por bëhen verifikime, pyetje, hetime, pa bujë, por vetëm ditë pas dite, një ditë do të arrihet në krye që të çohen në gjykatë në mos ë gjithë të paktën disa nga përgjegjësit. Të cilët sipas konceptit “i mbyturi të mbyt” mund të nxjerrin edhe bashkëpunëtorët apo ata që sot quhen rëndom si “peshqit e mëdhenj”. /tesheshi.com/
