Ministri i Rendit Sandër Lleshaj vizitoi në spitalin e traumës disa efektivë policorë të lënduar gjatë protestës të së shtunës nga ana e opozitës, ku dhe njëherë paralajmëroi për mbajtjeje përgjegjësie.
”Sapo vizitova policët e plagosur në Spitalin e Traumës. Pasojë e një protestë të dhunshme, të maskuar nga nata dhe maskat e vërteta, si ato që përdor jo rrallë krimi.
Mirënjohje për punonjësit e Policisë shqiptare. Solidaritet me fëmijët, bashkëshortet, nënat dhe familjarët e tyre.
Organizatorët dhe ekzekutorët e dhunës, kanë sulmuar jo vetëm institucionet kushtetuese dhe Policinë, por edhe qetësinë e qytetarëve, rendin publik dhe imazhin e vendit dhe për këto do të mbajnë përgjegjësi ligjore, publike dhe politike.
Dhuna nuk është opsion!”, shkruan Lleshaj.
Ndërkohë, edhe nga opozita u pretendua se ka patur dhunë policore ndaj disa protestuesve. Pos kësaj, edhe njëherë u kundërshtua me forcë përdorimi i gazit lotsjellës, duke u konsideruar si masë ekstreme dhe me pasoja.
Por gjithashtu, me gojën e Sekretarit të Përgjithshëm Gazmend Bardhi, u pretendua se policët e lënduar e makinat e djegura janë një sajesë.
“Janë të tmerruar nga bashkimi i shqiptarëve! S’u mjaftoi gazi helmues dhe uji me presion i përdorur në mënyrë kriminale kundër qytetarëve. Turp! Llesh Kimiku sajoi skenarë me djegie makinash fallco e policë ‘të dhunuar’ për të mbuluar frikën e shefit të tij të vetmuar”, u shpreh zyrtari i lartë demokrat. /tesheshi.com/
