Paralel, burrë e grua, i kumtuan publikut qëndrimet e tyre politike pas një disfate të rëndë në zgjedhje.
Ilir Meta, në rolin e presidentit, bëri të qartë se nuk do japë dorëheqje, ndryshe nga ç’kishte premtuar. Me gjuhën e e zëdhënësit, u tha: “Në respekt të sakrificave për demokracinë, që ka bërë LSI, presidenti i njofton të gjithë anëtarët dhe simpatizantët e saj se më 24 korrik 2022 do të rikthehet për të marrë kartën e anëtarësisë së LSI dhe do t’u bashkohet përpjekjeve të të rinjve dhe të rejave për Shqipërinë e Shqiptarëve”.
Nga ana tjetër, bashkëshortja e tij në krye të LSI-së, i kërkoi falje bashkëshortit që s’ja dëgjoi këshillat.
“….Fatkeqësisht zbatuam një strategji që pati pasojat në këtë rezultat që nuk reflektoi vullnetin e qytetarëve për ndryshim, një strategji të gabuar duke filluar që nga djegia e mandateve, mosmarrja pjesë në zgjedhjet lokale që dashje padashje i dhamë të gjitha pushtetet Edi Ramës….Kjo tregoi që shqetësimi i presidentit ishte i drejtë për këtë situatë që gjendemi sot dhe në emër të LSI dhe timin i kërkojmë falje për këtë çast e veprim…”, ishin fjalët e Kryemadhit.
Iu përgjigj bashkëshorti me gjuhën e zëdhënësit: “Presidenti e falenderon për reflektimin e saj lidhur me lënien e mandateve dhe bojkotin e zgjedhjeve vendore, që e mbifuqizuan pushtetin e kryeministrit…”. /tesheshi.com/
