Nga Blendi Gashi
“A po nisemi sonte për Gjermani”, “vëlla pritna se nesër jemi në Zvicër”, realacion udhëtimi “Drenicë – Shtutgart”, janë disa nga statuset e bëra nga kosovarët në rrjetet sociale me doza humori pas ratifikimit të Demarkacionit me Malin e Zi, duke aluduar se tashmë do u hiqen vizat.
Por edhe pse ikën tre ditë prej kur u plotësua kushti vendimtar, Dema…rkacioni, ende nuk ka një datë të saktë se kur më të vërtetë kosovarët do udhëtojnë pa viza.
Këtë përgjigje nuk po mund t’ua japin as krerët e shtetit që njëzëri po thonë se “Kosova e kreu punën e saj dhe tashmë duhet ta kryejë edhe Brukseli”. Ndërsa me gjysmë zëri përshpërisin se do hiqen brenda 9 muajsh.
Për dallim nga krerët e Prishtinës, Brukseli zyrtar është treguar më i matur në deklarimet e bëra, duke ju bërë të qartë kosovarëve se nuk duhet të jenë aq euforikë, pasi institucionet para vetes kanë edhe kriterin e luftimit të korrupsionit, për çka do të vëzhgohen.
“Bashkimi Evropian pret që të gjitha palët në Kosovë të vazhdojnë punën e madhe dhe përpjekjet e suksesshme për të arritur udhëtimin pa viza për popullin e Kosovës dhe në interes të rajonit”, thuhet në deklaratën e lëshuar nga shefja e Lartë për Politikë të Jashtme në Bashkimin Europian, Federica Mogherini; Komisionari për Punë të Jashtme, Johannes Hahn dhe Komisionari për Çështje të Brendshme, Dimitris Avramopoulos, të cilët nuk japin datë se kur mund të hiqen vizat.
Ja procedurat dhe afatet për liberalizmin e vizave
Proceduralisht, për liberalizim të vizave, në BE rol luajnë tre akter kryesorë: Komisioni, Parlamenti dhe Këshilli.
Fillimisht, Komisioni e bënë vlerësimin se janë plotësuar të gjitha kushtet për liberalizim.
Pastaj, Parlamenti Evropian mandatohet nga Komisioni Parlamentar kompetent (LIBE – Komisioni për të drejta civile, drejtësi dhe punë të brendshme). Më pas, Këshilli miraton pozicionin negocues, që i hapë rrugë trialogut mes Komisionit, Këshillit dhe Parlamentit, ku dakordohet për përmbajtjen e tekstit i cili më pas hidhet në votim. Pas dakordimit të tekstit, propozimi për liberalizim hidhet në votim në seancë plenare në Parlament, ku nevojitet shumica e kualifikuar. Në të njëjtën kohë, edhe Këshilli duhet ta votoj propozimin, me shumicë të kualifikuar (55% e vendeve të BE-së që përfaqësojnë 65% të popullsisë).
E tërë kjo procedurë mund të zgjasë 6 deri në 9 muaj.
Nëse vlerësohet se Kosova ka përmbushur të gjitha kriteret, liberalizimi mund të vjen më së afërmi në vjeshtën e vonë; në të kundërtën edhe këtë vit kosovarët do jenë të izoluar dhe nuk mund të “jetësohet” relacioni me kombibus “Drenicë – Shtutgart”. /tesheshi.com/
