Ish-kryeministri i Portugalisë duket se do të jetë zëvendësuesi i Ban Ki-Moon-it në detyrën e sekretarit të përgjithshëm të OKB-së.
Një votim ditën e shkuar nga 15 anëtarët e Këshillit të Sigurimit për 10 kandidatët për postin nxori se asnjë nuk e kishte kundërshtuar emrin e Guterres-it.
Sot do të pasojë një tjetë votim formal në Këshillin e Sigurimit të OKB-së për të konfirmuar kandidaturën e tij, ku nuk pritet të ketë surpriza.
“Sot, pas votimit tonë të gjashtë, ne kemi një favorit të qartë, dhe emri i tij është Antonio Guterres,” u tha gazetarëve ambasadori rus në OKB, Vitaly Churkin, i cili kryeson Këshillin e Sigurimit.
Që Guterres t’i rekomandohet zyrtarisht Asamblesë së Përgjithshme të OKB-së për zgjedhje, Këshilli Sigurimit duhet të miratojë një rezolutë me dyer të mbyllura. Rezoluta kërkon nëntë vota pro, e asnjë vendosje vetoje, për t’u miratuar.
Kryeministër i Portugalisë në vitet 1995-2002, Antonio Guterres ka drejtuar UNHCR-në, agjencinë për refugjatët, për dhjetë vite, nga 2005-a në 2015-n.
Ban Ki-Moon e lë postin e sekretarit të përgjithshëm të OKB-së në janar të 2017-s, pas dhjetë vitesh në detyrë. /tesheshi.com/
