Portugalia e ka patur vërtet pisk sot ndaj Marokut, por ka mjaftuar një gol i Ronaldo-s për të marrë një fitore 1-0.
Ronaldo shënoi golin e vetëm të ndeshjes në minutën e 4-t, dhe të katërtin e tij në këtë botëror.
Maroku, ndërkaq, bëri ç’mundi sidomos në pjesën e dytë, pa ia dalë sidoqoftë as të barazojë.
Fitorja e ngjit Portugalinë në kuotën e 4 pikëve në grupin B, pranë kalimit në fazën tjetër.
Sa për Marokun, nuk ka qoftë dhe një shpresë matematikore për të qëndruar në lojë. Ndeshja ndaj Spanjës të hënën nuk do të ketë vlerë të mirëfilltë, dhe pas saj do të vijë kthimi në shtëpi.
Përndryshe, Ronaldo u bë me realizimin e sotëm golashënuesi më i mirë europian, me 85 gola të shënuar në 152 ndeshje të luajtura me kombëtaren portugeze. Ai la pas Ferenc Puskas-in, lojtarin që kishte shënuar 84 gola në 89 aktivizime me Hungarinë dhe Spanjën. Në nivel botëror, më i pari është iraniani Ali Daei, shënues i 109 golave në 149 ndeshje. /tesheshi.com/
