Kur Cristiano Ronaldo e la fushën në minutën e 24-t, u duk se fati i Portugalisë qe vendosur tashmë. Gjithçka ngjante e destinuar të punonte në të mirë të të zotëve të shtëpisë, të “gjelave” që kishin nisur të këndonin që nga minuta e parë.
Por shprehja “qesh mirë kush qesh i fundit” i shkon saktësisht për shtat finales së Euro 2016-tës, që për fitues pati Portugalinë. E para kupë për portugezët, që sonte kanë gjithë të drejtën që të festojnë.
Në prani të 75.868 të pranishmëve në stadiumin “Stade de France”, finalja mes Francës dhe Portugalisë do të niste vrullshëm për vendasit, që në minutat e para kanë tërë zotërimin e lojës. Epërsia do të kishte si kulm një goditje me kokë të Griezmann-it, që u prit shkëlqyeshëm nga Rui Patricio, heroi i portugezëve në këtë mbrëmje, e njëkohësisht dhe lojtari më i mirë i ndeshjes.
Dalja e Ronaldo-s së dëmtuar do të ishte shkurajuese fillimisht, për t’u kthye më pas në burim force për portugezët, të vendosur që të qëndrojnë gjer në fund.
Ndërsa pjesa e parë nuk do të sillte ndryshim të rezultatit, pjesa e dytë do të ofronte gjithashtu një sërë rastesh nga të dy palët. Franca i afrohet golit në minutën e 92-të, por topi i Gignac-ut prek shtyllën anësore të portës.
Portugezët tregohen edhe një herë ekspertë të vërtetë në shtesa, ashtu si me Kroacinë. Goli i fitores për ta vjen në minutën e 109-të, kur Eder lëshon një goditje të beftë nga jashtë zonës, duke e bërë Lloris-in të dorëzohet. Portugalia kryeson 1-0.
Asgjë nuk e ndryshon këtë rezultat gjer në fund. Shpërthen stoli i portugezëve me mbylljen e lojës, me të parin Ronaldo-n që nuk përmbahet.
Portugalia ka fituar në një finale ku protagonist nuk ishte as Ronaldo e as Griezmann, as Payet e as Nani, as Quaresma e as Pogba. Fitorja erdhi nga këmba e një lojtari pak të dëshiruar, që pak qe aktivizuar gjer më tani. Eder u dha fitoren portugezëve, edhe pse askush nuk kishte besuar fort tek ai.
Ndër reagimet e para pas ndeshjes është ai i Jose Mourinho-s, që ka shkruar në llogarinë e tij elektronike, “Nëse dëshironi të vizitoni vendin e kampionëve europianë, vizitoni Portugalinë!”
Disi ndryshe ka qenë reagimi i ish-sulmuesit të Francës dhe Arsenalit, Thierry Henry, që deklaron, “Nëse e lejoni ekipin e tretë në fazën në grupe të kualifikohet, ata e dinë se tre barazime do të mjaftojnë. Jam i lumtur të shoh gjëra të tilla si Shqipëria të fitojë një ndeshje, Islanda të bëjë atë që bëri, por mendoj se rregulli i ri e vrau fazën në grupe.”
Mbyllet kështu ky Kampionat Europian me fitoren e Portugalisë, me të parin trofe të ngritur prej saj në aktivitete të këtij niveli. /tesheshi.com/
