Nga Roald A. Hysa
Pëllumbat dhe kumurijat e Pazarit të Ri e kanë një mik që kujdeset dhe i ushqen ato për ditë. Atyre nuk iu mungon gruri e misri gjatë gjithë ditës dhe i sheh gjatë gjithë ditëve të vitit tek rrinë mbi shtyllat dhe kabllot e korentit tek presin me durim të madh racionin ditor. Të gjithë aty në Pazar e dinë që Xhepi i ushqen pëllumbat dhe kumurijat, madje ato ulen te thasët me grurë, misër e luledielli e ushqehen pa pasur frikë se dikush mund t’i vrasë. Megjithëse është i ri në moshë, ai quhet Rexhep dhe të gjithë e thërrasin Xhepi. Së bashku me dy vëllezërit e vet kanë një dyqan zogjsh e peshqish për zbukurim mu në mes të Pazarit të Ri. Aty mund të gjesh shumë gjëra dhe shumë lloje zogjsh e papagajsh. Zogj të egër si gardalina, verdulla etj., po ashtu edhe të butë si kanarina, papagaj, të cilët këndojnë gjatë gjithë kohës dhe të kënaqin me këngën e tyre.
Në këtë dyqan mund të gjesh edhe disa lloje peshqish të vegjël që mbahen për zbukurim, peshq të kuq e deri një lloj peshkaqeni të rrallë i zi me përmasa shumë të vogla. Shumë fëmijë të Pazarit shkojnë rregullisht dhe e vizitojnë dyqanin e Xhepit për t’i parë nga afër zogjtë e peshqit, kanë shumë dëshirë t’i prekin, porse janë kafshë delikate dhe duhet treguar një kujdes shumë i madh për to. Po aty mund të gjesh edhe të gjithë aksesorët e nevojshëm për këto kafshë, kafaze e akuariume, dhe ajo që është më e rëndësishme për këto lloj kafshësh e shpendësh edhe ushqimin e posaçëm për to.
Deri këtu nuk ka ndonjë gjë të veçantë, sepse dyqane të tilla edhe më të pasura me kafshë ekzotike ka sa të duash nëpër Tiranë, porse e veçanta qëndron tek pronari i këtij dyqani Xhepi. Ai rregullisht kujdeset jo vetëm për shpendët e dyqanit të vet, por edhe për pëllumbat dhe kumuritë që e kanë mësuar këtë zakon dhe rrinë vazhdimisht aty rrotull. Xhepi, së bashku me vëllezërit e vet Visin (Elvisin) dhe Mulin (Flamurin) i ushqejnë rregullisht duke iu hedhur misër. Madje kur pëllumbat dhe kumuritë ulen mbi thasët më grurë, misër e luledielli e hanë aty, ata nuk i prekin, por i lejnë të vazhdojnë të qeta punën e tyre.
Xhepi nuk flet shumë, sepse i ka fjalët e pakta, por i dallohet zemërmirësia në veprime. Nuk i pëlqen të flasë shumë dhe nuk shprehet pse e bën këtë veprim. Vetëm buzëqesh dhe vazhdon muhabetin diku tjetër. Aty vjen edhe Hakiu, djali i xhaxhait të Xhepit dhe na tregon, se në Tiranë janë vendosur rreth 400 vite më parë nga fshati Ferrje kohë kur zbriti stërgjyshi i tyre Mustafai, prej të cilit trashëgojnë ndoshta edhe mbiemrin. Mustafa, Muçi, Muça dhe sot familja Muça ka boll pjesëtarë që janë shumë afër me gjak dhe me shtëpitë afër njëri-tjetrit pikërisht në një nga lagjet më të vjetra të Tiranës pranë Pazarit të Ri.
Xhepi është vazhdimisht në shërbim të njerëzve dhe jo vetëm që ju shet klientëve zogjtë apo peshqit, por njëkohësisht ai iu ofron edhe këshillat e nevojshme për përdorimin dhe mirëmbajtjen e tyre. Njeri i përkushtuar ndaj familjes së vet dhe punës së tij të përditshme në Pazar. Të gjithë të njohurit e vet aty në Pazar kur i vijnë në dyqan e kanë pirë një kafe aty me Xhepin dhe e kanë bërë një dorë muhabet, siç e lyp mikpritja e tironcit. Ai madje preokupohet kur nuk e ka qerasur ndonjë nga vizitorët e zakonshëm të dyqanit të vet. Vizitorë të zakonshëm janë edhe fëmijët e lagjes aty rrotull.
Pasioni më i madh i Xhepit si për çdo burrë është futbolli, por më tepër është Tirona e dashur, saqë edhe ballin e dyqanit të vet e ka lyer bardhëeblu. Të mos harrojmë që vëllai i Xhepit, Gentian Muça është titullar i Tironës, dhe kur vjen Genti aty një tufë ultrasish të Tironës mblidhen e diskutojnë me zjarr për Tironën me Gentin. E kështu rrjedhin ditët për Xhepin, deri sa vjen e premtja, kur së bashku me vëllezërit e vet i drejtohen xhamisë së Kokonozit për të falur xhumanë.
Një nga kontributet për komunitetin që japin vëllezërit Muça është edhe zbukurimi me lulet e stinës për xhaminë e Kokonozit. Xhepi së bashku me Petritin, një bahçevan kur ndërron stina diskutojnë së bashku, se më çfarë do ta zbukurojnë xhaminë. Manushaqet, trëndafilat, lule zjarri e lloje të tjera lulesh sipas ngjyrave e zbukurojnë oborrin e xhamisë rregullisht. Ai është një familjar i rregullt gjithashtu dhe ka një vajzë të vogël, të cilën si çdo baba i mirë është i dashuruar marrëzisht. /tesheshi.com/
