Një lajm tronditës vjen nga futbolli gjerman. Mjekëve iu desh t’i prisnin këmbën portierit të Union Berlin.
Bëhet fjalë për Berkin Arslanogullarin, 18 vjeç, gjerman me origjinë turke, i cili prej muajsh lufton me kancerin e kockave.
Mjekët e zbuluan sëmundjen e tij në fillim të vitit dhe pas kimioterapisë iu desh të bënin një hap radikal. Mjekimi nuk ishte i suksesshëm, ndaj për të parandaluar përhapjen e sëmundjes, Berkinit i është prerë këmba.
“Me gjithë tentativat dhe kimioterapinë, kanceri nuk u mposht dhe për t’i shpëtuar jetën, na u desh t’i prisnim këmbën Berkinit”, thuhet në njoftimin në faqen e internetit të Union Berlin.
Arslanogullari kaloi në të gjitha kategoritë më të reja në klubin nga Berlini dhe më 21 prill të këtij viti debutoi për ekipin e parë të Unionit në një ndeshje miqësore kundër Magdeburgut, në të cilën Unioni fitoi me rezultat 3-1.
Portieri i ri ishte shpresa e madhe e klubit dhe një nga lojtarët më të mirë në grupmoshën e tij, por tashmë karriera e tij ka përfunduar.
“Tashmë kam kapërcyer shumë pengesa në jetën time. Këtë sëmundje do ta luftoj me të gjitha mjetet që kam në dispozicion. Falënderoj të gjithë për mbështetjen”, ka shkruar Arslanogullari.
Për të ndihmuar lojtarin e ri, ata nisën një fushatë humanitare për të mbledhur fonde për të dhe familjen e tij. Klubi tashmë ka dhuruar për këtë fushatë, dhe ka ftuar të gjithë tifozët që të bëjnë të njëjtën gjë. /tesheshi.com/
