Mediat sportive italiane flasin për një huazim njëvjeçar të Joe Hart-it te Torino, diçka që pritet të finalizohet mbrëmjen e kësaj të hëne.
Portieri i Mançester Sitit do të jetë sonte vetë në Torino për ta përmbyllur çështjen e huazimit. La Gazzetta dello Sport flet për negociata që janë drejt fundit për huazimin e gardianit të përfaqësueses së Anglisë.
Raportohet që Hart ka parapëlqyer Torinon, e jo Sandërlendin. Klubi aktual i tij, Mançester Siti, do të mbulojë 70 për qind të rrogës së lojtarit, e pjesa e mbetur do të paguhet nga Torino.
Joe Hart, një titullar i padiskutueshëm në sezonet e shkuara te Mançester Siti, e ka humbur vendin e tij në portë që me ardhjen e teknikut spanjoll Pep Guardiola. Ky i fundit ia ka besuar portën argjentinasit Caballero, por me transferimin e Claudio Bravo-s nga Barcelona, është kiliani ai që me siguri do të jetë zgjedhje e parë.
Nga të tëra takimet e fillimsezonit, Hart ka luajtur vetëm në sfidën e kthimit të play-off-it të Champions League-s, ndaj Steauasë së Bukureshtit. /tesheshi.com/
