Qeveria paraqiti projektin e Portit të ri të Durrësit, zhvendosur në Porto Romano.
Rama tha se ky port do jetë një tjetër nyje strategjike për rajonin. “Ambicia jonë është që porti i ri të bëhet nyja më e rëndësishme strategjike e gjithë qarkullimit detar me Perëndimin dhe me gjithçka tjetër shkon përtej saj, për të gjithë Ballkanin Perëndimor.
Ky është një port që e çon bashkëpunimin rajonal në një nivel krejt tjetër dhe për këtë arsye, ne e kemi nisur këtë proces paralelisht në radhë të parë me Kosovën dhe ashtu siç kemi filluar punën për hekurudhën, nga ana tjetër kemi mbështetur financiarisht si qeveri studimin e fizibilitetit për Portin e thatë të Prishtinës.
Një nga lajmet më të mira të Samitit ishte mes të tjerave edhe fakti se Korridori 8 është zyrtarisht i përfshirë në rrjetin e infrastrukturës së qarkullimit rrugor dhe hekurudhor të Bashkimit Evropian”, tha Rama në prezantim.
Sa për ndërtimin e tij, Rama tha se priten në garë kompani nga vendet mike dhe partnere.
“Gara do të jetë e hapur. Dihet se kush nuk mund të hyjë në këtë garë. Ne presim kompani nga vendet mike dhe partnere. E shikoj me shumë kënaqësi praninë e ambasadorëve holandezë, italianë, japonezë apo përfaqësuesit të ambasadës së SHBA-së e ambasadorit britanik.
Ne do të mirëpresim me krahë hapur dhe do të garantojmë transparencë të plotë për të gjitha kompanitë nga BE, Britania e Madhe, Turqia, Lindja e Mesme dhe SHBA. Kjo është sfera e operacionit të kompanive se porti ka edhe një dimension tjetër për të cilin po punojmë dhe jemi në komunikim të vazhdueshëm me NATO-s, ka pjesën ushtarake që është tjetër”, tha ai. /tesheshi.com/
