Ndihmëssekretarja amerikane e shtetit, Viktoria Nuland ka deklaruar se forcimi i sundimit të ligjit, i sistemit të drejtësisë, dhe luftimi i korrupsionit e krimit të organizuar, janë thelbësore për përparimin e Kosovës. Nuland i bëri këto komente gjatë takimit me kryekuvendarin, Kadri Veseli, ku u bisedua për proceset aktuale nëpër të cilat është duke kaluar Kosova.
Nuland theksoi se qeveria amerikane vazhdon të mbështesë fuqishëm Kosovën në ecjen e saj përpara.
Nga ana e tij, kryetari Veseli theksoi se mbetet i përkushtuar tërësisht në agjendën e forcimit të shtetit ligjor në Kosovë si dhe në reformat e domosdoshme institucionale që kanë të bëjnë me agjendën evro-atlantike të vendit.
Sipas një komunikate për media nga kuvendi i Kosovës, në takim u bisedua edhe për transformimin e FSK-së, si proces i domosdoshëm në kuadër të forcimit të shtetit të Kosovës. /tesheshi.com/
