Të enjten në mbrëmje u publikua një mesazh i Muhammed Mursit, presidentit egjiptian të zgjedhur demokratikisht e të rrëzuar dhunshëm, në faqen e tij në Facebook e në llogarinë në Twitter, ku u bënte thirrje mbështetësve të vet ta vazhdonin revolucionin.
Ai uroi Egjiptin me rastin e Fitër Bajramit, por nuk harroi ta inkurajonte popullin që ta çonte në fund revolucionin.
Bëhet e ditur që ai të ketë thënë, “Forca dhe vendosmëria ime nuk janë dobësuar ende, dhe besimi im në fitore është i pakufishëm.”
Mesazhi pretendohet të jetë dërguar nga burgu, teksa për të është dhënë një dënim me vdekje.
“Revolucioni juaj ka për t’u parë e analizuar nga të gjithë popujt e botës, prandaj çojeni në fund atë, ndërsa ai do ta çlirojë kombin,” qe një porosi tjetër e tij në këtë mesazh.
Mursi i ka mbyllur rreshtat duke iu referuar vetes si presidenti i Republikës Arabe të Egjiptit, e duke uruar popullin për Fitër Bajramin.
Ky është mesazhi i tretë i pretenduar të jetë dërguar nga Muhammed Mursi që kur ai u burgos një vit më parë. /tesheshi.com/
