Një libër për xhudon, shkruar nga presidenti Vladimir Putin dhe një oligark me ndikim, mik i tij, do të shpërndahet për miliona fëmijë shkolle në Rusi.
Libri, një histori e sportit e titulluar “Rruga e butë”, u promovua si pjesë e një ceremonie në Moskë që u mbajt për paraqitjen e skuadrës ruse të xhudos që do të marrë pjesë në Lojërat Olimpike të Rio de Zhaneiros në muajin gusht.
Bashkëautori i librit është miku i vjetër i Putinit, Arkady Rotenberg, i cili është president i shtëpisë botuese që publikon librin, “Iluminizmi” e kompanitë e të cilit kanë fituar me miliarda dollarë nga kontratat shtetërore në vitet e fundit.
Së bashku me një libër instruksionesh të titulluar “Arti i xhudos: nga nisja tek mjeshtëria”, shkruar nga Rotenberg dhe dy ekspertë të xhudos e me 90 karta laminat për trajnim, libri i Putin do të shpërndahet këtë vjeshtë në duart e 7 milionë fëmijëve të shkollave nga klasa e parë deri tej e katërta, sipas zyrtarëve të shtëpisë botuese.
Sipas tyre, librat janë dizenjuar të popullarizojnë një mënyrë jetese të shëndetshme dhe të jenë një instrument për “formimin e atletëve luftarakë dhe rritjen personale të harmonishme”.
“Për autorët e këtij kompleksi botimesh, Vladimir Putin, Arkady Rotenberg, Dmitry Chernykh dhe Alexei Levitsky, xhudoja është bërë pjesë e jetëve të tyre”, thonë zyrtarët.
“Një politikan, një sipërmarrës, një mësues e një akademik metodologjist, ata janë bashkuar nga xhudoja dhe nga aspirata për të kaluar në duart e brezit të ri eksperiencën dhe njohuritë e tyre”.
Putin mori brezin e tetë në xhudo në vitin 2012, por ai e ka praktikuar këtë art marcial që kur ishte adoleshent në Shën Petërsburg, në atë kohë i njohur si Leningradi, kohë kur Rotenberg ishte partneri i tij në sport.
I njohur tashmë për paraqitjet e tij në sport, presidenti është bashkëautor i disa librave të xhudos. Një ndër videot e fundit në janar të këtij viti e tregonte në një seancë stërvitore ku hidhte kundërshtarët në tapet, mes të cilëve edhe trajnerin.
Disa nga partnerët e vjetër të xhudos të Putinit kanë pasur një sukses profesion të jashtëzakonshëm: Gennady Timchenko, në listën e sanksioneve të Shteteve të Bashkuara si bashkëthemelues i grupit tregtar energjetik Gunvor, ka vënë një pasuri prej 13.3 miliardë dollarësh, ndërsa ish-truproja e Putinit, Viktor Zolotov u caktua kreu i rojës kombëtare në prill, një post i fuqishëm.
Kompanitë e Rotenberg morën të paktën 7 miliardë dollarë në kontrata për lojërat olimpike dimërore në Sochi në vitin 2014 dhe ai fitoi edhe një kontratë 3 miliardë dollarë për ndërtimin e një ure midis Rusisë dhe gadishullit të Krimesë që u aneksua në vitin 2014. Pas spastrimit të librave shkollorë në qarkullim në vitin 2014, shtëpia e tij botuese fitoi 60 deri në 70 për qind të kontratave për tekstet e reja shkollore.
Përgatiti: Juli Prifti – /tesheshi.com/
