Presidenti Donald Trump është i gatshëm për një takim me presidentin rus Vladimir Putin, por vetëm pasi Rusia të lirojë marinarët ukrainas, të cilët u arrestuan gjatë incidentit në ngishticën Kerck të Detit Azov dhe t’i kthejë Kievit anijet ushtarake të konfiskuar të Ukrainës, tha Sekretari i Shtetit të Shteteve të Bashkuara Mike Pompeo.
“Ne duam që marinarët dhe anijet të kthehen”, tha Pompeo në përgjigje të një pyetjeje në lidhje me kushtin e palës amerikane për vazhdimin e dialogut me Rusinë.
Pompeo ka shprehur keqardhje për anulimin e takimit të dy presidentëve, duke theksuar se “shkak ishin rusët me sjelljen e tyre “.
“Presidenti Trump tha se ai dëshiron të takohet dhe të bisedojë me presidentin Putin”, theksoi kreu i diplomacisë amerikane, duke shtuar se Shtetet e Bashkuara dhe Rusia janë në një situatë ku dialogu nuk mund të zhvillohet.
Gjithsesi, Trump pati një “bisedë joformale” me Putinin të premten, sipas një infoje nga zëdhënësja e Shtëpisë së Bardhë, Sarah Sanders.
Sipas saj, dy presidentë folën gjatë një darke në samitin e G20.
Siç tha ajo, si zakonisht në takimet shumëpalëshe, presidenti i SHBA dhe Zonja e Parë kishin bisedime joformale dhe me shumë udhëheqës botërorë për darkë, përfshirë Putinin. /tesheshi.com/
