Sekretari i Shtetit Mike Pompeo i quajti “tronditëse” dhe “shqetësuese” faktin e pretenduar nga një hulumtim, sipas të cilit Partia Komuniste në pushtet kineze përdor sterilizimin e detyruar dhe abortet kundër pakicës muslimane, raporton Reuters
Ai iu referua një raporti mbi situatën në rajonin kinez të Xinjiang, nga studiuesi gjerman Adrian Zenz, botuar nga qendra amerikane kërkimore Jamestoën Foundation me qendër në Uashington.
Pompeo, një kritik i vazhdueshëm i Kinës, përfshirë trajtimin e e saj ndaj muslimanëve në Xinjiang, tha në një deklaratë se gjetjet ishin në përputhje me dekada të praktikës së Partisë Komuniste Kineze, “e cila tregon një mosrespektim ekstrem për shenjtërinë e jetës njerëzore dhe dinjitetin themelor të njeriut”.
“Ne i bëjmë thirrje Partisë Komuniste të Kinës që menjëherë t’u japë fund këtyre praktikave të tmerrshme dhe u kërkojmë të gjitha vendeve të bashkohen me Shtetet e Bashkuara për t’i dhënë fund këtij abuzimi dehumanizues,” deklaroi Pompeo.
Në raportin e tij, Zenz tha se gjetjet e tij janë prova më e fortë se politika e Pekinit në Xinjiang ka përmbushur një nga kriteret e KB për genocidin, që është “imponimi i masave që synojnë parandalimin e lindjeve brenda grupeve”.
Zenz pretendon se një analizë e dokumenteve të qeverisë kineze ka treguar që rritja natyrale e popullsisë në Xinjiang ka “rënë ndjeshëm”. Ai tha se në dy prefekturat më të mëdha ujgure me popullsi muslimane, normat e rritjes ranë me 84 përqind midis 2015 dhe 2018 dhe më tej në 2019. /tesheshi.com/
