Kandidati i koalicionit Berisha-meta për bashkinë Has, Miftar Dauti ka denoncuar kandidatin socialist për këtë bashki, Halit Muja, se djali i tij ka shpërndarë pako ushqimore dhe produkte të tjera te qytetarët, sipas tij “për të blerë votën më 14 maj”.
Duke publikuar një video, Dauti pretendon se djali i Halit Mujajt ka shpërndarë pako ushqimore me një furgon.
Por si reagim ndaj këtyre akuzave, kandidati i PS-së, Halit Muja sqaroi se ato janë pako ushqimore të përvitshme që shpërndahen për Natën e Kadrit, që ishte më 17 prill.
“Në këtë Natë Kadri dua të shpreh gjithë keqardhjen time, gjithë neverinë dhe indinjatën jo vetëm time, ndaj rivalit tim, që disa pako tradicionalisht të përvitshme në këtë natë të bekuar jepen, po e ekzagjeron si blerje votash. Më vjen turp dhe u them sinqerisht se, nuk arrij ta kuptoj gjithë këtë ekzagjerim!”, shkruan Muja në rrjetet sociale. /tesheshi.com/
