Në ashpërsinë e luftës politike edhe në kuadër të krizës epidemike, PD nuk ka kursyer dhe Komitetin e Ekspertëve, duke e quajtur atë si shërbëtor të Ramës. Kjo pasi shefja e Infektivit Najada Çomo mohoi të ketë patur raste infektimi që në janar.
“Në janar ne kemi fluks të shtuar pacientësh për shkak të ekzistencës së gripit. Që në fund të janarit ne kemi pasur një vëmendje të shtuar, pasi kemi pasur persona të ardhur nga Kina, por nuk ka pasur raste. I përgjigjem zyrtarisht pyetjes, se në Shërbimin Infektiv nuk ka pasur kurrsesi persona të infektuar nga Covid-19 më herët”, tha ajo gjatë një komunikimi me të parin e qeverisë, së bashku me kolegë të tjerë të Komunitetit Teknik.
Reagoi më pas nr.2 i PD-së Gazmend Bardhi duke i futur ata, ekspertët në thonjëza, e që sipas tij i shërbejnë verbërisht Ramës.
“Virusi ka qenë në Shqipëri në që janar, por ekspertët e Ramës e mohojnë pa sjellë asnjë fakt, por duke dhënë vetëm opinionin që i pëlqen kryeministrit. Asnjë studim nuk ka as se sa qytetarë e kanë kaluar, sepse Edi Ramës nuk i pëlqen e vërteta, por vetëm trillimi i vet dhe ‘ekspertët’ bëhen verbtazi pjesë e llogarive personale politike të kryeministrit! Të rrojë partia e vazhdojmë sipas skenarit”, shkruan Bardhi. /tesheshi.com/
