Opozita shqiptare bëri një lëvizje simbolike me mesazh të fortë politik, me një zhvendosje në Shkodër, në një takim sfidues ndaj mazhorancës, duke shfrytëzuar situatën e rënduar te Rendit në qytetin verior. E bëri këtë duke pasuar dhe një praktikë po aq politike të Ramës, datuar që pas fitores së tij më 2013-ën.
Jo në Tiranë por në Vlorë, qytetin ku ai u zgjodh deputet, Rama do mblidhte të tijtë në një lokal të Uji i Ftohtë, në një tip kafe-pune, si pikënisje e qeverisjes klasike. Por jo vetëm kaq; në mandatin e dytë Rama do “hapërdante” qeverinë nga qyteti në qytet, duke organizuar mbledhje të saj fundjavore jashtë Tirane. Mesazhi: duhet të shkojmë pranë njerëzve, të shihemi, prekemi e flasin nga afër. Dhe patjetër që më shumë imazh se sa thelb.
Të njëjtën gjë bëri dhe opozita, por duke dubluar parlamentin. Por as Rama e as Basha, nuk e kanë risi këtë zgjedhje.
Si ide, ndonëse e parealizuar, i takon Frok Çupit në ’97-ën. I rreshtuar kundër qeverisjes Berisha, ndër më të zëshmit me gjuhën e tij të hidhur kundër pushtetit të asaj kohe, jo si zyrtar a partiak por si gazetar, Çupi do të bënte thirrje që parlamentin i dalë pas zgjedhjeve të parakohshme të 28 qershorit të mblidhej në Vlorë.
Në gjykimin e tij, kryeqytet i politikës, por dhe i Shqipërisë në një kontekst, ishte Vlora. Dhe parlamenti i një Shqipërië post-berishiane duhej të mblidhej pikërisht aty. Nuk jepte detaje teknike si e qysh, por përqëndrohej të thirrja për t’u mbledhur në Vlorën që sipas tij kishte bërë historinë duke larguar Berishën nga pushteti.
Por te mazhoranca e re, kjo thirrje nuk zuri vend për asnjë csast; as që u diskutua madje, dhe dëshira e Çupit mbeti thjesht një përjetim individual që do harrohej shpejt.
Por ja që pas afro dy dekadash, Rama e Basha po aplikojnë në forma të ngjashme idenë e harruar të Frrokut. /tesheshi.com/
