PD e ka etiketuar si “ngjarje të rëndë” atë që pretendon se ka ndodhur te Qyteti Studenti, rënia e një suvaje pas rikonstruksionit të godinave. “Një ngjarje e rëndë në Qytetin Studenti, e ndodhur, fatmirësisht, në mungesë të studentëve, po u risjell atyre në vëmendje mashtrimin e madh të Edi Ramës dhe Erion Veliajt për përmirësimin e kushteve të jetësës në konvikte. Rrëzimi i tavaneve në një prej konvikteve që gjoja u rikonsteuktuan pas protestës së studentëve, është treguesi më i qartë i propagandës së rrezikshme të Ramës dhe Veliajt”, tha ish-deputetja Oriola Pampuri.
Iu përgjigj bashkia, duke thënë se dëmtimi ka ardhur për shkak të tërmetit të javëve më parë, e që për këtë ka dhe një akt-ekspertimi.
“Pas tërmetit të fortë të 21 Qershorit, në Qytetin Studenti ka patur dëme minimale, të tipit plasaritje suvaje, se në shumë ndërtesa në zonën e prekur nga tërmeti. Bashkia e Tiranës kërkoi një verifikim të specializuar të dëmtimeve nga Instituti i Ndërtimit, i realizuar më datë 27 Shtator 2019, i cili konstatoi dëme në rifiniturat e objektit, si plasaritje dhe çarje të suvatimeve, pa probleme për strukturën mbajtëse të godinës. Bashkëlidhur gjeni edhe aktin e ekspertimit nga Inspektorati i Ndërtimit”, u mbrojt bashkia e Tiranës. /tesheshi.com/
