Vënia në qarkullim e 30 autobusëve të ri nga Komuna e Prishtinës ka zgjuar reagime pozitive tek qytetarët. Disa nga ta kanë dalë që të bëjnë një xhiro me ta.
Dje, për nder të 9-vjetorit të pavarësisë së Kosovës udhëtimi me këta autobusë në linjat 4 dhe 1 ka qenë pa pagesë.
Gjatë tërë ditës është parë se këta autobusë kanë qenë të mbushur plotë me udhëtarë. Por si duket vënia në qarkullim i këtyre autobusëve i ka penguar dikujt. Sot janë publikuar fotografi ku shihet xhami i një autobusi që është thyer.
“Kot e kanë! Prishtina po bëhet”, ishte reagimi i Shpend Ahmetit për këtë rast.
Në lidhje me këtë rast ka reaguar zyrtari për informim i Komunës së Prishtinës, duke e konsideruar këtë akt si të ulët, ndërsa ka lënë të kuptohet se kjo është bërë nga rivalët politikë që nuk po duan të shohin sukseset e Komunës së Prishtinës nën udhëheqjen e Shpend Ahmetit.
“Kur s’kanë çka me na bo neve, i bien autobusit! “Partitë e ardhmërisë evropiane”, ka shkruar Vraniqi.
Ndryshe, dje me një lloj entuziazmi u raportua nga disa media të afërta me partitë në pushtet se një autobus është prishur. Më i çudishëm ishte lajmi i publikuar nga Gazetaexpress e cila ka raportuar për prishjen e një autobusi duke prezantuar një fotografi. Por ky lajm u demantua nga vet fotografia e paraqitur pasi në të ku ishte një autobus me defekte teknike shihej se kishte borë përreth, ndërsa dje në Prishtinë ka mbretëruar mot me diell, ndërsa bora ka javë që është shkrirë.
Prishjen e abusit e ka demantuar edhe kryetari i Prishtinës, Shpend Ahmeti. Ai ka thënë se nuk ka pasur asnjë defekt në asnjërin prej autobusëve, ndërsa ka rikujtuar se edhe në rast të prishjes autobusët kanë garancion sipas kontratës.
“Asnjë autobus nuk është prish sot. I pash disa tituj me gëzim kishin lajmëruar. Edhe po të prishen, janë më garancion. Është kontratë ndërkombëtare kjo”, ka shkruar Ahmeti.
Vënia në qarkullim e 30 autobusëve të ri dhe ardhja e 21 të tjerëve gjatë këtyre muajve, pritet që ta përmirësoj transportin publik në Prishtinë.
Blerja e këtyre autobusëve është karakterizuar me përplasje ndërmjet Komunës së Prishtinës dhe Ministrisë së Financave. Kjo e fundit u akuzuara nga kryetari Ahmeti se për inate politike nuk po e nënshkruante dokumentin për garancinë e kredisë. Ky nënshkrim u dha pas një viti dhe ndodhi pas protestave të qytetarëve dhe problematizimit të kësaj çështje. /tesheshi.com/
