Deklarata raciste e një politikani lokal në Itali kundër emigrantëve duke i krahasuar ato me kafshë gjuetie ka shkaktuar reagime të forta.
Prej vitesh në skenën politike italiane mungonin deklarata dhe etiketime të tilla, derisa këshilltari për sigurinë dhe policinë lokale në Rozzano, Marco Andrea Ercoli, në një chat privat mes politikanësh do të shkruante: “kalendari i gjuetisë, hapja e sezonit, gjatë gjithë vitit ndaj kafshëve migratore të gjahut: marokenë, rumunë, bullgarë, shqiptarë, kosovarë, talebanë, afganë, ciganë, jokomunitarë në përgjithësi”.
“Në prezencë të kopeve të shumta lejohet edhe përdorimi i granatave të dorës, armëve automatike dhe gazit helmues”, vijon komenti
Gjuha e përdorur nga këshilltari kundër emigrantëve, solli një reagim të fortë të opozitës, e cila kërjkoi dorëheqjen e Marco Andrea Ercoli. Por kryetarja e bashkisë Barbara Agogliati e ka justikuar veprimin duke e quajtur një “gabim nga pakujdesia”.
Ky postim nuk mbeti vetëm në chat, pasi një person ende i paidentifikuar e shndërroi atë në një fletëpalosje duke e shpërndarë në tregun e sheshit Foglia, shumë pranë komunës së Rozzanos.
Me shkrim dore, po mbi këtë fletëpalosje lexohet gjithashtu informacioni se është shkruar nga një këshilltar bashkiak i Partisë Demokratike të kësaj qyteze.
“Partia Demokratike e Rozzanos ka fashistë në këshillin bashkiak”, shkruhet mbi fletëpalosje.
Gjithashtu mediat italiane informojnë se kjo fletëpalosje është shkruar nga këshilltari bashkiak Marco Andrea Ercoli, i cili ia ka shpërndarë privatisht kolegëve të tij të Këshillit komunal të Rozzanos.
Supozohet se një prej tyre ka stampuar mbi 100 kopje për të informuar qytetarët e kësaj komune se këshilltari në fjalë ka ideale raciste e fashiste.
Por ndaj këtij skandali kanë reaguar forcat politike të opozitës , Lëvizja 5 Yje, Forza Italia, madje edhe Lidhja e Veriut duke kërkuar gjatë mbledhjes së këshillit bashkiak dorëheqjen e përfaqësuesit të PD Marco Andrea Ercoli.
“Idetë e tij janë qartësisht ektremiste të djathta e nuk kuptojmë se çfarë bën ai brenda grupit të të së majtës?” akuzojnë ata.
Në emër të komunitetit shqiptar në Rozzano, Skënder Zeneli, duke shprehur indinjatën për këtë gjest të papërgjegjshëm, thotë: “pak ditë më parë në një takim me kryetaren e bashkisë kërkuam dorëheqjen e këtij eksponenti, por për fat të keq veprimi i tij u minimizua dhe u justikua. Jemi të vendosur ta vazhdojmë protestën tonë edhe në bashkëpunim me komunitetet e tjera të huaja që jetojnë në Itali”. /tesheshi.com/
