Geert Wilders, një politikan holandez i së djathtës me pikëpamje ekstreme, do të paraqitet në gjyq në vendin e tij për nxitje të urrejtjes ndaj pakicës marokene.
Siç mësohet nga Al Jazeera, prokurorët e mbështesin akuzën e tyre në një aktivitet të zhvilluar në marsin e vitit 2014, kur Wilders ka kërkuar të dijë nga një turmë mbështetësish nëse dëshironin më pak marokenë në Holandë. Përgjigjes së tyre, “më pak”, ai i është kthyer me këto fjalë, “Do të kujdesemi për këtë!”
Dy janë akuzat me të cilat do të përballet Geert Wilders, ajo për diskriminim, dhe tjetra, për nxitje të urrejtjes. Komentet e tij vënë në shënjestër një racë të veçantë, çka përbën krim. Pakica marokene përbën dy për qind të popullsisë në Holandë, e atë Wilders e etiketoi dhe si “fundërrinë” në një transmetim televiziv.
Themelues e udhëheqës i Partisë për Lirinë, Wilders mund të dënohet me një vit burgim e me një gjobë prej 7.400 eurosh.
Reagimi i tij në një postim në rrjetet sociale javën e shkuar ka qenë i tillë: “Askush nuk do të ma mbyllë gojën. As për marokenët.” /tesheshi.com/
