Ish-presidenti i Sllovenisë, Borut Pahor, tha se Kosova duhet të formojë një bashkim të komunave serbe (ZSO), por se Serbia, në të njëjtën kohë, duhet t’i drejtohet Perëndimit.
Siç tha ai, “një lloj komuniteti” duhet të ekzistojë në Kosovë sepse formimi i tij do të rriste besimin mes Kosovës dhe Serbisë.
Në bisedën e organizuar nga Këshilli Atlantik, Pahor tha se gjithmonë e ka mbështetur dialogun mes dy palëve, për të cilin thotë se nuk është perfekt, por ka dhënë rezultate, transmeton Tanjug.
Ai ka theksuar se një marrëveshje e mirë përfundimtare për Kosovën nuk do të arrihet nëse autoritetet në Serbi dhe presidenti Aleksandar Vuçiq janë në anën e Moskës.
“Gjithçka do të varet nga vlerësimi i presidentit Vuçiq”, beson Pahor.
“Serbia do të largohet nga Rusia”
Në anën tjetër, ai thekson se, nëse Serbia anon nga pala evropiane, “herët a vonë” do të arrihet një lloj marrëveshje që do t’i sigurojë Kosovës “një lloj pavarësie formale, diplomatike”.
Duke folur për situatën në Ballkanin Perëndimor për shkak të pushtimit rus në Ukrainë, ish-presidenti slloven tha se pyetja kryesore është se ku do të jetë Ballkani Perëndimor pas përfundimit të konfliktit, duke theksuar se kjo varet më së shumti nga vendimi i Serbisë. Ai shtoi se Perëndimi duhet të frymëzojë Serbinë që të largohet nga Rusia dhe të anohet me Perëndimin “sepse atëherë i gjithë rajoni do të jetë në anën perëndimore të një Evrope të ndarë”.
“Nëse Serbia zgjedh Rusinë, atëherë mendoj se do të përballemi me një lloj destabiliteti në të gjithë rajonin në vitet apo dekadat e ardhshme”, tha Pahor.
Ai theksoi se nuk i takon vetëm Serbisë të vendosë, por edhe Bashkimi Evropian duhet të intensifikojë procesin e zgjerimit.
“Tani është një çështje gjeopolitike, jo vetëm një çështje e masave teknike,” tha ai.
“Mungesa e besimit”
Ai tha se është sfidë e madhe për Serbinë që të vendosë se në anën e kujt do të jetë në të ardhmen.
“Nuk bëhet fjalë vetëm për para dhe vullnet politik, por edhe për durim nga ana jonë, që t’i japim kohë Serbisë që hap pas hapi të marrë vendime të caktuara dhe në fund të kalojë në anën tonë”, tha Pahor.
Ai shtoi se e di që ka mungesë besimi në Perëndim ndaj autoriteteve në Serbi, por thekson se ia vlen të jesh i durueshëm dhe të punosh me Beogradin sepse bëhet fjalë për paqen dhe stabilitetin në Ballkanin Perëndimor në dekadat e ardhshme. /tesheshi.com/
